കൊച്ചി: ദീര്ഘകാലത്തെ അനുഭവസമ്പത്തുള്ളവരും പരിണതപ്രജ്ഞരുമായ മാധ്യമപ്രവര്ത്തകര് നയിക്കുന്ന രണ്ടു മലയാളം ചാനലുകള്ക്ക് വാര്ത്താവിതരണവകുപ്പിന്റെ 48 മണിക്കൂര് സംപ്രേഷണവിലക്ക് വന്നിരിക്കുന്നു എന്നുള്ളത് ഗൗരവതരമാണെന്ന് ബിജെപി സംസ്ഥാന പ്രസിഡന്റ് കെ സുരേന്ദ്രന്. രാജ്യതലസ്ഥാനത്തുനടന്ന ദുഖകരമായ ഒരു വര്ഗ്ഗീയകലാപത്തെക്കുറിച്ച് തികഞ്ഞ സംയമനത്തോടെയും വിവേകപൂര്വ്വവും നിയമവിധേയവുമായ നിലയിലും വാര്ത്തകള് സംപ്രേഷണം ചെയ്യാനുള്ള ഉത്തരവാദിത്വം മാധ്യമങ്ങള്ക്കുണ്ടാവേണ്ടതാണ് എന്ന പൊതുബോധം മറന്നുപോവാതിരിക്കാനുള്ള ജാഗ്രത പൊതുസമൂഹം പ്രതീക്ഷിക്കുന്നുണ്ട്. ഇത്തരം സന്നിഗ്ദഘട്ടങ്ങളില് ജനങ്ങളെ പരസ്പരം തമ്മില്തല്ലിക്കാതിരിക്കാനും എത്രയും വേഗം സമാധാനം ഉറപ്പുവരുത്താനുമുള്ള ഉത്തരവാദിത്വം സര്ക്കാരിനെന്നപോലെ മാധ്യമങ്ങള്ക്കുമുണ്ടൈന്് കെ സുരേന്ദ്രന് പറഞ്ഞു.
സ്ഥാപിതതാല്പ്പര്യങ്ങളും രാഷ്ട്രീയ വിയോജിപ്പും പ്രകടിപ്പിക്കാനുള്ള അവസരമല്ല ഇത്തരം ആപല്ഘട്ടങ്ങളെന്ന് എല്ലാവരും ഓര്ക്കേണ്ടതായിരുന്നു. ആത്മപരിശോധനയ്ക്കും സ്വയംവിമര്ശനത്തിനും ബന്ധപ്പെട്ടവരെല്ലാവരും തയ്യാറാവുകയാണ് വേണ്ടത്. വൈര്യനിര്യാതനബൂദ്ധിയോടെ നാടിന്റെ ഉത്തമതാല്പ്പര്യത്തിനു വിരുദ്ധമായി പെരുമാറാന് മീഡിയാ വണ് തയ്യാറാവുന്നതിന്റെ താല്പ്പര്യം എല്ലാവര്ക്കും മനസ്സിലാവും. എന്നാല് ഏഷ്യാനെറ്റില് നിന്ന് പൊതുജനം അതു പ്രതീക്ഷിക്കുന്നില്ലെന്നും കെ സുരേന്ദ്രന് ഫെയ്സ്ബുക്ക് കുറിപ്പില് പറയുന്നു.
ഡല്ഹിയിലെ വര്ഗീയ കലാപം റിപ്പോര്ട്ട് ചെയ്യുന്നതുമായി ബന്ധപ്പെട്ട മാര്ഗനിര്ദേശങ്ങള് ലംഘിച്ചുവെന്ന് കാണിച്ചാണ് കേന്ദ്ര വാര്ത്ത പ്രക്ഷേപണ മന്ത്രാലയം മലയാളം വാര്ത്ത ചാനലുകളായ ഏഷ്യനെറ്റ് ന്യൂസിന്റെയും മീഡിയ വണ്ണിന്റെയും സംപ്രേഷണം 48 മണിക്കൂര് നേരത്തെക്ക് തടഞ്ഞിരുന്നു. വെള്ളിയാഴ്ച രാത്രി 7.30 മുതലാണ് ഇരു ചാനലുകളുടെയും സംപ്രേഷണം മുടങ്ങിയത്.
കലാപം റിപ്പോര്ട്ട് ചെയ്തപ്പോള് സന്തുലിതമായി കാര്യങ്ങള് അവതരിപ്പിച്ചില്ല, ഡല്ഹി പൊലീസിനെ പ്രതിസ്ഥാനത്ത് നിര്ത്തി തുടങ്ങിയ കാര്യങ്ങള് പറഞ്ഞാണ് വിലക്ക്. ഈ ചാനലുകള് അപ്ലിങ്ക് ചെയ്യുന്ന സ്വകാര്യ ഏജന്സികളോടാണ് കേന്ദ്ര സര്ക്കാര് വിലക്ക് ഏര്പ്പെടുത്താനായി ആവശ്യപ്പെട്ടത്. രണ്ട് ചാനലുകള്ക്കും ഈ വിഷയത്തില് നേരത്തെ തന്നെ സര്ക്കാരിന്റെ നോട്ടീസ് ലഭിച്ചിരുന്നെന്നും അതിന് രണ്ടുകൂട്ടരും മറുപടി നല്കിയിരുന്നെന്നും വിവരമുണ്ട്. ഈ മറുപടി തള്ളിക്കളഞ്ഞ കേന്ദ്ര സര്ക്കാര് നിരോധനം നടപ്പാക്കാന് പോകുകയാണെന്ന് രണ്ട് ചാനലുകളെയും ഇന്ന് വൈകീട്ട് അറിയിച്ചിരുന്നു.
കെ സുരേന്ദ്രന്റെ കുറിപ്പിന്റെ പൂര്ണരൂപം
ദീര്ഘകാലത്തെ അനുഭവസമ്പത്തുള്ളവരും പരിണതപ്രജ്ഞരുമായ മാധ്യമപ്രവര്ത്തകര് നയിക്കുന്ന രണ്ടു മലയാളം ചാനലുകള്ക്ക് വാര്ത്താവിതരണവകുപ്പിന്റെ 48 മണിക്കൂര് സംപ്രേഷണവിലക്ക് വന്നിരിക്കുന്നു എന്നുള്ളത് ഗൗരവതരമാണ്.
രാജ്യതലസ്ഥാനത്തുനടന്ന ദുഖകരമായ ഒരു വര്ഗ്ഗീയകലാപത്തെക്കുറിച്ച് തികഞ്ഞ സംയമനത്തോടെയും വിവേകപൂര്വ്വവും നിയമവിധേയവുമായ നിലയിലും വാര്ത്തകള് സംപ്രേഷണം ചെയ്യാനുള്ള ഉത്തരവാദിത്വം മാധ്യമങ്ങള്ക്കുണ്ടാവേണ്ടതാണ് എന്ന പൊതുബോധം മറന്നുപോവാതിരിക്കാനുള്ള ജാഗ്രത പൊതുസമൂഹം പ്രതീക്ഷിക്കുന്നുണ്ട്. ഇത്തരം സന്നിഗ്ദഘട്ടങ്ങളില് ജനങ്ങളെ പരസ്പരം തമ്മില്തല്ലിക്കാതിരിക്കാനും എത്രയും വേഗം സമാധാനം ഉറപ്പുവരുത്താനുമുള്ള ഉത്തരവാദിത്വം സര്ക്കാരിനെന്നപോലെ മാധ്യമങ്ങള്ക്കുമുണ്ട്. സ്ഥാപിതതാല്പ്പര്യങ്ങളും രാഷ്ട്രീയ വിയോജിപ്പും പ്രകടിപ്പിക്കാനുള്ള അവസരമല്ല ഇത്തരം ആപല്ഘട്ടങ്ങളെന്ന് എല്ലാവരും ഓര്ക്കേണ്ടതായിരുന്നു. ആത്മപരിശോധനയ്ക്കും സ്വയംവിമര്ശനത്തിനും ബന്ധപ്പെട്ടവരെല്ലാവരും തയ്യാറാവുകയാണ് വേണ്ടത്. വൈര്യനിര്യാതനബൂദ്ധിയോടെ നാടിന്റെ ഉത്തമതാല്പ്പര്യത്തിനു വിരുദ്ധമായി പെരുമാറാന് മീഡിയാ വണ് തയ്യാറാവുന്നതിന്റെ താല്പ്പര്യം എല്ലാവര്ക്കും മനസ്സിലാവും. എന്നാല് ഏഷ്യാനെറ്റില് നിന്ന് പൊതുജനം അതു പ്രതീക്ഷിക്കുന്നില്ല.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates