ഹരാരെ: ഇതിഹാസ സ്പിന്നർ ഷെയ്ൻ വോണിനു ശേഷം ഏകദിനത്തിൽ 200 വിക്കറ്റുകൾ നേടുന്ന രണ്ടാമത്തെ ഓസ്ട്രേലിയൻ സ്പിന്നറെന്ന നേട്ടം ആ​ദം സാംപ സ്വന്തമാക്കി. ഹരാരെയിൽ സിംബാബ്‍വെക്കെതിരായ രണ്ടാം ഏകദിനത്തിൽ 84 റൺസ് വിജയം സ്വന്തമാക്കിയ മത്സരത്തിൽ താരം 2 വിക്കറ്റുകൾ വീഴ്ത്തിയാണ് നേട്ടത്തിലെത്തിയത്. 291വിക്കറ്റുകളാണ് ഷെയ്ൻ വോണിന്റെ പേരിലുള്ളത്.

ഓസ്ട്രേലിയ 356 റൺസെന്ന കൂറ്റൻ സ്കോറുയർത്തിയ മത്സരത്തിൽ സാംപ 9 ഓവറുകൾ എറിഞ്ഞ് 62 റൺസ് വഴങ്ങിയാണ് 2 വിക്കറ്റുകൾ നേടിയത്. ഇന്നസെന്റ് കയ, ക്രെയ്​ഗ് ഇർവിൻ എന്നിവരാണ് സാംപയുടെ ഇരകളായത്. ഏകദിനത്തിൽ 200 വിക്കറ്റുകൾ നേടുന്ന ഏഴാമത്തെ ഓസ്ട്രേലിയൻ ബൗളറായും സാംപ മാറി.

ഗ്ലെൻ മ​ഗ്രാത്താണ് ഏകദിനത്തിൽ ഏറ്റവും കൂടുതൽ വിക്കറ്റെടുത്ത ഓസ്ട്രേലിയൻ ബൗളർ. നിലവില്‍ 123 ഏകദിനങ്ങളില്‍ നിന്നു 201 വിക്കറ്റുകള്‍ സാംപ വീഴ്ത്തിയിട്ടുണ്ട്. 12 തവണ താരം നാല് വിക്കറ്റ് നേട്ടവും ഒരു തവണ അഞ്ച് വിക്കറ്റ് നേട്ടവും സ്വന്തമാക്കി. 35 റൺസ് വഴങ്ങി 5 വിക്കറ്റെടുത്തതാണ് മികച്ച പ്രകടനം. 193 മത്സരങ്ങളിൽ നിന്നാണ് വോൺ 291 വിക്കറ്റുകൾ നേടിയത്.