ക്വലാലംപുർ: ബാഡ്മിന്റൺ മത്സരങ്ങൾ അടിമുടി മാറുന്നു. നിലവിൽ 21 പോയിന്റുകൾ വീതമുള്ള 3 ​ഗെയിമുകളാണ് കളിക്കുന്നത്. ഇതു മാറ്റി 15 പോയിന്റുകൾ വീതമുള്ള 3 ​ഗെയിമുകളായി ചുരുക്കാനാണ് ലോക ബാഡ്മിന്റൺ ഫെഡറേഷൻ (ബിഡബ്ല്യുഎഫ്) പദ്ധതിയിടുന്നത്. ഇതിന്റെ പ്രാരംഭ പ്രവർത്തനങ്ങൾ ഫെഡറേഷൻ തുടങ്ങി. മാരത്തൺ റാലികൾ ആരാധകരെ ബോറടിപ്പിക്കുന്നവെന്ന വിലയിരുത്തലും മാറ്റത്തിനു പിന്നിലുണ്ട്.

ഈ വർഷം ഏപ്രിൽ മാസം മുതൽ തിരഞ്ഞെടുത്ത ദേശീയ, അന്തർദേശീയ മത്സരങ്ങളിൽ പുതിയ സ്കോറിങ് സിസ്റ്റം പരീക്ഷണാടിസ്ഥാനത്തിൽ നടപ്പാക്കും. പ്രായോ​ഗികമെങ്കിൽ അടുത്ത വർഷത്തെ ബിഡബ്ല്യുഎഫ് ജനറൽബോഡി യോ​ഗം സ്കോറിങ് സിസ്റ്റത്തിനു അന്തിമ അനുമതി നൽകും.

സിനിമയ്ക്കിടെ രോഹിതിന്റെ വിളി വന്നു, പാതിയിൽ നിർത്തി ശ്രേയസ് മുറിയിലേക്ക് മടങ്ങി!

നേരത്തെയും മത്സര പരിഷ്കാരത്തിനു ഫെഡറേഷൻ ശ്രമിച്ചിട്ടുണ്ട്. 11, 5, 7 പോയിന്റുകളുടെ ​ഗെയിമാണ് പരീക്ഷിച്ചത്. പിന്നീട് 2006 മുതലാണ് നിലവിൽ കാണുന്ന 21 പോയിന്റുകളുടെ മൂന്ന് ​ഗെയിം പോരാട്ടങ്ങൾ ആരംഭിച്ചത്. റാലി ഫോർമാറ്റിലാണ് മത്സരങ്ങൾ.

നിലവിലെ ഫോർമാറ്റിൽ മത്സരങ്ങൾ മത്സരങ്ങൾ പലപ്പോഴും ഒന്നര മണിക്കൂറിലേറെ നീളാറുണ്ട്. ഇത് ​ഗെയിമിന്റെ ആകർഷണം കുറയ്ക്കുന്നുവെന്നും കളിക്കാരെ തളർത്തുന്നുവെന്നും വിലയിരുത്തിയാണ് വീണ്ടുമൊരു പരിഷ്കാരത്തിലേക്ക് ഫെ‍‍ഡറേഷൻ നീങ്ങുന്നത്.