ചെന്നൈ: ഐപിഎൽ ഒരുക്കങ്ങളുടെ ഭാഗമായി ചെന്നൈ സൂപ്പർ കിങ്‌സ് ക്യാംപിന് തുടക്കമായി. ക്യാംപില്‍ പങ്കെടുക്കാനായി എം എസ് ധോനി ചെന്നൈയിൽ എത്തി. ഹോട്ടലിൽ താരത്തിന് ഗംഭീര സ്വീകരണമാണ് ടീം മാനേജ്‍മെന്റ് നൽകിയത്. ഇത്തവണത്തെ ഐപിഎൽ സീസണിൽ ധോനി കളിക്കുമെന്ന് ടീം സിഇഒ നേരത്തെ തന്നെ വ്യക്തമാക്കിയിരുന്നു.

ചെന്നൈയിലെ ക്ലബ്ബിന്റെ ഹൈ-പെർഫോർമൻസ് സെന്ററിലാണ് ക്യാംപ് നടക്കുന്നത്. ആദ്യ ഘട്ടത്തിൽ 15 ഇന്ത്യൻ താരങ്ങൾ ആകും ക്യാംപിൽ പങ്കെടുക്കുക. നിലവിൽ ടി20 ലോകകപ്പിൽ ഇന്ത്യൻ ടീമിനൊപ്പം കളിക്കുന്ന സഞ്ജു സാംസൺ, ശിവം ദുബെ തുടങ്ങിയവർ ടൂർണമെന്റ് അവസാനിച്ചതിന് ശേഷം ടീമിനൊപ്പം ചേരും. രഞ്ജി ട്രോഫി ഫൈനലിൽ കളിച്ച ശ്രേയസ് ഗോപാലും പിന്നീട് റിപ്പോർട്ട് ചെയ്യും

ടി20 ലോകകപ്പ് അവസാനിച്ചതിന് ശേഷം വിദേശ താരങ്ങളും പരിശീലകരും ടീമിനൊപ്പം ചേരും. ആദ്യ ഘട്ട ക്യാമ്പ് സഹപരിശീലകരായ ശ്രീധരൻ ശ്രീരാം, രാജീവ് കുമാർ എന്നിവരുടെ മേൽനോട്ടത്തിലായിരിക്കും നടത്തുക. മിഡിൽ ഈസ്റ്റിലെ സംഘർഷ സാഹചര്യത്തെ തുടർന്ന് വിദേശ താരങ്ങൾ ടീമിനൊപ്പം ചേരുന്നത് സംബന്ധിച്ച് അനിശ്ചിതത്വമുണ്ട്. ഇത്തവണത്തെ ഐപിഎൽ സീസൺ മാർച്ച് 28-ന് ആരംഭിക്കുമെന്നാണ് റിപ്പോർട്ടുകൾ .