ഫിലാഡാൽഫിയ: ഫ്രാൻസ്- പരാ​ഗ്വെ പ്രീ ക്വാർട്ടർ മത്സരത്തിനിടെ താരങ്ങൾ തമ്മിൽ കൈയാങ്കളി നടന്നത് 2 തവണ. ഫ്രഞ്ച് ക്യാപ്റ്റൻ കിലിയൻ എംബാപ്പെയെ നിരന്തരം ഫൗൾ ചെയ്തതാണ് കൈയാങ്കളിയിലേക്ക് നയിച്ചത്. മത്സരം പുരോഗമിക്കുന്നതിനിടെയാണ് മൈതാനത്ത് താരങ്ങൾ തമ്മിൽത്തലാൻ ഒരുമ്പെട്ടത്.

മത്സരത്തിന്റെ 34ാം മിനിറ്റിലാണ് ആദ്യ സംഭവം. എംബാപ്പെയെ ഫൗൾ ചെയ്തതിന് പിന്നാലെയാണ് ഫ്രാൻസ്- പരാ​ഗ്വെ താരങ്ങൾ ഏറ്റുമുട്ടിയത്. റഫറി ഉടൻ തന്നെ ഇടപെട്ട് രംഗം ശാന്തമാക്കുകയായിരുന്നു.

ഫ്രാൻസിന്റെ കിടിലൻ മുന്നേറ്റത്തിന് പിന്നാലെയാണ് സംഭവം. പരാ​ഗ്വെ ഗോൾമുഖം ലക്ഷ്യമാക്കി എംബാപ്പെ പന്തുമായി മുന്നേറി. ഇടതു വിങ്ങിൽ നിന്ന് ഡ്രിബിൾ ചെയ്ത് ഓടിക്കയറിയ എംബാപ്പെയെ പരാ​ഗ്വെ താരം ഫൗൾ ചെയ്ത് വീഴ്ത്തി. പിന്നാലെ എംബാപ്പെ പരാ​ഗ്വെ താരത്തെ പിടിച്ചുതള്ളി. ഇതോടെ പ്രശ്‌നം രൂക്ഷമായി. പിന്നാലെ ഇരു ടീമുകളിലേയും താരങ്ങൾ തമ്മിൽ കൈയാങ്കളി തുടങ്ങി. റഫറി താരങ്ങളെ പിടിച്ചുമാറ്റാൻ ശ്രമിച്ചു. ഫ്രഞ്ച് പരിശീലകൻ ദിദിയർ ദെഷാംപ്സും അന്തരീക്ഷം ശാന്തമാക്കാൻ ശ്രമിക്കുന്നുണ്ടായിരുന്നു. ഏറെ നേരത്തിന് ശേഷമാണ് രംഗം ശാന്തമായത്.

ഈ സംഭവം കഴിഞ്ഞ് 4 മിനിറ്റിനുള്ളിൽ അടുത്ത അടിയും പൊട്ടി. ഇത്തവണയും എംബാപ്പെയെ പരാ​ഗ്വെ താരം ഫൗൾ ചെയ്തതു തന്നെയായിരുന്നു പ്രകോപനം. കൗണ്ടർ അറ്റാക്കിനൊടുവിൽ പന്ത് വലതു വിങ്ങിലേക്ക് കൈമാറി ബോക്‌സിലേക്ക് ഓടുകയായിരുന്നു എംബാപ്പെ. അതിനിടെയാണ് ഫ്രഞ്ച് നായകനെ പരാ​ഗ്വെ താരം ഫൗൾ ചെയ്തു വീഴ്ത്തിയത്. ഇതും തർക്കത്തിലാണ് ഒടുവിൽ കലാശിച്ചത്. റഫറി ഇടപെട്ടാണ് രം​ഗം ശാന്തമാക്കിയത്.

മത്സരത്തിൽ ഫ്രാൻസ് മറുപടിയില്ലാത്ത ഒറ്റ ​ഗോളിനു പരാ​ഗ്വെയെ വീഴ്ത്തി ക്വാർട്ടറിലേക്ക് മുന്നേറി. കിലിയൻ എംബാപ്പെ നേടിയ പെനാൽറ്റി ​ഗോളിലാണ് ഫ്രാൻസിന്റെ ജയം.