നാഗ്പുര്‍: ന്യൂസിലന്‍ഡിനെതിരായ ടി20 പരമ്പരയിലെ ആദ്യ മത്സരത്തിന് മുന്നോടിയായി നെറ്റ്സിൽ പരിശീലനം നടത്തി ഇന്ത്യൻ താരങ്ങൾ. ഹർദിക് പാണ്ഡ്യയുടെ കൂറ്റൻ അടികളോടെ തുടങ്ങിയ പരിശീലനത്തിൽ മലയാളി താരം സഞ്ജു സാംസൺ, ജസ്പ്രിത് ബുംറ,ശിവം ദുബെ,സൂര്യകുമാർ യാദവ് എന്നിവരും മികച്ച പ്രകടനമാണ് പുറത്തെടുത്തത്. പരിശീലനത്തിന്റെ ദൃശ്യങ്ങൾ ബി സി സി ഐ തന്നെ സോഷ്യൽ മീഡിയയിൽ പങ്കു വെച്ചിട്ടുണ്ട്.

കൂറ്റൻ സിക്സറുകൾ അടിച്ചാണ് ഹർദിക് പാണ്ഡ്യ നെറ്റ്സിൽ പരിശീലനം ആരംഭിച്ചത്. പാണ്ഡ്യയുടെ ഷോട്ട് ഗാലറിയിൽ എത്തിയതോടെ കോച്ച് ഗൗതം ഗംഭീറിനും ക്യാപ്റ്റൻ സൂര്യകുമാർ യാദവിനും കൗതുകം അടക്കാനായില്ല. തൊട്ടു പിന്നാലെയെത്തിയ സഞ്ജു സാംസണും മികച്ച പ്രകടനമാണ് പുറത്തെടുത്തത്. ബാറ്റിങ്ങിന് ശേഷം ഹർദിക് നെറ്റ്സിൽ ബോളിങ് പരിശീലവും നടത്തി.

അഞ്ച് മത്സരങ്ങളടങ്ങിയ ടി20 പരമ്പര നാളെയാണ് ആരംഭിക്കുന്നത്. നാഗ്പുരിലെ വിദര്‍ഭ ക്രിക്കറ്റ് സ്റ്റേഡിയത്തിലാണ് മത്സരം. ഇത്തവണത്തെ ടി20 ലോകകപ്പ് കളിക്കുന്ന താരങ്ങളെല്ലാം ടീമിലുണ്ട്. ഈ പരമ്പരയിലൂടെ ലോകകപ്പ് മത്സരങ്ങൾക്ക് ആത്മവിശ്വാസം കൂട്ടാനാണ് താരങ്ങളുടെ നീക്കം.