പുനെ: വനിതാ ടി20 ഫോര്‍മാറ്റിലെ ഏറ്റവും വേഗമേറിയ അര്‍ധ സെഞ്ച്വറിയെന്ന ലോക റെക്കോര്‍ഡ് ഇന്ത്യന്‍ സ്പിന്നര്‍ പ്രേമ റാവത്ത് സ്വന്തമാക്കി. പാകിസ്ഥാന്‍ ക്യാപ്റ്റന്‍ ഫാത്തിമ സന നേടിയ 15 പന്തില്‍ അര്‍ധ സെഞ്ച്വറി നേട്ടമാണ് താരം തിരുത്തിയത്.

ബിസിസിഐ സീനിയര്‍ വനിതാ ദേശീയ ടി20 പോരാട്ടത്തിലാണ് താരത്തിന്റെ റെക്കോര്‍ഡ് പ്രകടനം. ഹൈദരാബാദിനെതിരായ പോരാട്ടത്തില്‍ ഉത്തരാഖണ്ഡിനായി ബാറ്റിങിനിറങ്ങിയ പ്രേമ 6 ഫോറും 4 സിക്‌സും സഹിതം 14 പന്തില്‍ അതിവേഗം 50 റണ്‍സിലെത്തി. താരത്തിന്റെ മികവില്‍ ടീം 187 റണ്‍സെന്ന മികച്ച സ്‌കോറും ഉയര്‍ത്തി.

മത്സരത്തില്‍ ഹൈദരാബാദിന്റെ പോരാട്ടം 20 ഓവറില്‍ 98 റണ്‍സില്‍ അവസാനിച്ചു. 89 റണ്‍സ് വിജയമാണ് ഉത്തരാഖണ്ഡ് സ്വന്തമാക്കിയത്. റെക്കോര്‍ഡ് അര്‍ധ സെഞ്ച്വറിക്കൊപ്പം പ്രേമ ബൗളിങിലും തിളങ്ങി ഓള്‍റൗണ്ട് മികവ് പുറത്തെടുത്തു. താരം 4 ഓവറില്‍ 12 റണ്‍സ് മാത്രം വഴങ്ങി 2 വിക്കറ്റ് സ്വന്തമാക്കി.

അതേസമയം അന്താരാഷ്ട്ര ക്രിക്കറ്റില്‍ ഫാത്തിമ സനയുടെ റെക്കോര്‍ഡ് തന്നെ നിലനില്‍ക്കും. ഈ വര്‍ഷം സിംബാബ്‌വെക്കെതിരായ പോരാട്ടത്തിലാണ് ഫാത്തിമ സന 15 പന്തില്‍ 50 അടിച്ചത്. ന്യൂസിലന്‍ഡിന്റെ സോഫി ഡിവൈന്‍, ഓസ്‌ട്രേലിയയുടെ ഫോബ് ലിച്ഫീല്‍ഡ്, ഇന്ത്യയുടെ റിച്ച ഘോഷ് എന്നിവര്‍ 18 പന്തില്‍ അര്‍ധ സെഞ്ച്വറി നേടിയിരുന്നു. ഈ റെക്കോര്‍ഡാണ് സന ഫാത്തിമ തകര്‍ത്തത്.