മെല്ബണ്: ഓസ്ട്രേലിയക്കെതിരായ ബോര്ഡര് ഗാവസ്കര് ട്രോഫി ചാംപ്യന്ഷിപ്പിലെ ഇന്ത്യന് ടീമിന്റെ പ്രകടനത്തില് കടുത്ത അതൃപ്തി പ്രകടിപ്പിച്ച് പരിശീലകന് ഗൗതം ഗംഭീര്. നാലാം ടെസ്റ്റിലെ തോല്വിക്ക് ശേഷം ഡ്രസിങ്ങ് റൂമില് നടന്ന ചര്ച്ചയിലാണ് ഗംഭീര് പൊട്ടിത്തെറിച്ചത്. ടീമിലെ ചിലര് സ്വാഭാവിക കളി എന്ന നിലയില് അവരുടേതായ രീതിയിലാണ് കളിക്കുന്നത്. വിക്കറ്റുകള് വലിച്ചെറിയുകയും ചെയ്യുന്നുവെന്ന് ഗംഭീര് കുറ്റപ്പെടുത്തി.
താരങ്ങള്ക്ക് അവരുടെ ഇഷ്ടത്തിന് അനുസരിച്ച് കളിക്കാന് കഴിഞ്ഞ ആറുമാസം അവസരം നല്കി. ഇനിയും അത് തുടരാനാവില്ല. അതെല്ലാം നിര്ത്തേണ്ട സമയമായിരിക്കുന്നു. ഇനി ടീമിന്റെ ഗെയിം പ്ലാന് താന് തീരുമാനിക്കുന്നതുപോലെ കളിച്ചാല് മതി. അല്ലാത്തവര്ക്ക് ടീമിന് വെളിയില് പോകാമെന്നും ഗംഭീര് മുന്നറിയിപ്പു നല്കി.
കളിയുടെ സാഹചര്യവും പിച്ചിന്റെ സ്വഭാവവും അനുസരിച്ചാണ് തന്ത്രങ്ങള് ഒരുക്കുന്നത്. എന്നാല് താന് തീരുമാനിക്കുന്നതിന് വിരുദ്ധമായാണ് പല താരങ്ങളും ഗ്രൗണ്ടില് കളിക്കുന്നത്. ഇനിയും അത് വെച്ചു പൊറുപ്പിക്കാനാവില്ല. സാഹചര്യത്തിനും ഗെയിം പ്ലാനിനും അനുസരിച്ച് കളിക്കാത്തവരെ പുറത്താക്കാന് മടിക്കില്ലെന്നും ഗംഭീര് മുന്നറിയിപ്പ് നല്കിയെന്നാണ് റിപ്പോര്ട്ടുകള്.
നാലാം ടെസ്റ്റില് അനാവശ്യ ഷോട്ടിന് മുതിര്ന്ന് ഋഷഭ് പന്ത് വിക്കറ്റ് വലിച്ചെറിഞ്ഞതാണ് ടീമിന്റെ തോല്വിയില് നിര്ണായകമായതെന്നാണ് വിലയിരുത്തല്. ഇതോടെ സമനില സാധ്യതയും നഷ്ടമായി. വിരാട് കോഹ് ലിയാകട്ടെ പരമ്പരയില് വീണ്ടും എഡ്ജ് എടുത്ത് സ്ലിപ്പില് പിടികൊടുത്ത് പുറത്താകുന്നു. നായകന് രോഹിത് ശര്മ്മയാകട്ടെ, മെല്ബണ് ടെസ്റ്റിന്റെ രണ്ടാമിന്നിങ്സില് കരുതലോടെ തുടങ്ങിയെങ്കിലും, പതിവുപോലെ മികച്ച ഇന്നിങ്സ് കരുപ്പിടിപ്പിക്കാനാകാതെ പുറത്തായി.
അഞ്ചു ടെസ്റ്റുകള് അടങ്ങിയ പരമ്പരയില് ഓസ്ട്രേലിയ 2-1 ന് മുന്നിലാണ്. ഇന്ത്യ പരാജയപ്പെട്ട രണ്ടു ടെസ്റ്റുകളിലും ബാറ്റിങ് നിരയുടെ മോശം പ്രകടനം ഗംഭീറിനു മേല് കടുത്ത സമ്മര്ദ്ദമാണ് ഉണ്ടാക്കിയിട്ടുള്ളത്. ലോക ടെസ്റ്റ് ചാംപ്യന്ഷിപ്പ് ഫൈനലില് കയറാനുള്ള സാധ്യത അസ്തമിക്കാതിരിക്കണമെങ്കില് സിഡ്നിയില് നടക്കുന്ന അവസാന ടെസ്റ്റില് ഇന്ത്യയ്ക്ക് വിജയം അനിവാര്യമാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates