കൊച്ചി: കേരള ബ്ലാസ്റ്റേഴ്‌സിന്റെ മുന്നേറ്റനിരയിലേക്ക് മറ്റൊരു വിദേശ താരം കൂടി. 29 കാരനായ ഫ്രഞ്ച് വിങ്ങർ കെവിൻ യോക്കുമായി ക്ലബ് കരാറിലെത്തി. ഇരു വിങ്ങുകളിലും കളിക്കാൻ കഴിവുള്ള താരമാണ് യോക്ക്. 1.82 മീറ്റർ ഉയരമുള്ള താരത്തിന്ഇ രു കാലുകൾ കൊണ്ടും പന്ത് നിയന്ത്രിക്കാൻ കഴിവുണ്ട്. പന്തുമായുള്ള മുന്നേറ്റങ്ങളിലും വേഗതയിലും മികവ് പുലർത്തുന്ന താരത്തിന്റെ പ്രകടനം ടീമിന് നിർണ്ണായകമാകും.

ഗ്രീസിലെ പ്രൊഫഷണൽ ഫുട്ബോൾ ലീഗുകളിൽ നിന്നുള്ള അനുഭവസമ്പത്തുമായാണ് കെവിൻ യോക്ക് ബ്ലാസ്റ്റേഴ്‌സിലെത്തുന്നത്. 2024-25 സീസണിൽ ഗ്രീക്ക് സൂപ്പർ ലീഗിൽ ലെവാഡിയാക്കോസ് എഫ്.സിക്കായി കളിച്ച അദ്ദേഹം പിന്നീട് പി.എ.ഇ ചാനിയയെയും പ്രതിനിധീകരിച്ചു.

പാരിസ് സെൻ്റ് ജെർമൻ്റെ (PSG) യൂത്ത് സിസ്റ്റത്തിലൂടെ മികച്ച വളർന്നുവന്ന യോക്ക്, കരിയറിൽ ഇതുവരെ 84 സീനിയർ മത്സരങ്ങളിൽ നിന്നായി 7 ഗോളുകളും 13 അസിസ്റ്റുകളും നേടിയിട്ടുണ്ട്.

"സാങ്കേതിക മികവുള്ള ഒരു വിങ്ങറാണ് കെവിൻ. യൂറോപ്യൻ ഫുട്ബോളിലെ അദ്ദേഹത്തിന്റെ പരിചയസമ്പത്ത് ഞങ്ങളുടെ കളിശൈലിക്ക് ഗുണകരമാകും. വരാനിരിക്കുന്ന സീസണിൽ ടീമിന്റെ ആക്രമണനിരയിൽ അദ്ദേഹത്തിന്റെ സാന്നിധ്യം സഹായകമാകുമെന്ന് ഞങ്ങൾ കരുതുന്നു. കെവിനെ ബ്ലാസ്റ്റേഴ്‌സ് കുടുംബത്തിലേക്ക് ഞങ്ങൾ ഹൃദ്യമായി സ്വാഗതം ചെയ്യുന്നു." കെവിൻ യോക്കിൻ്റെ സൈനിംഗിനെക്കുറിച്ച് കേരള ബ്ലാസ്റ്റേഴ്‌സ് സിഇഒ അഭിക് ചാറ്റർജി പറഞ്ഞു.