ദുബായ്: ഐസിസി ലോക ടെസ്റ്റ് ചാംപ്യന്‍ഷിപ്പ് ഫൈനല്‍ പോരാട്ടത്തിന്റെ വേദിയാകാന്‍ ഇന്ത്യ ഇനിയും 8 വര്‍ഷം കൂടി കാത്തിരിക്കണം. സമീപകാലത്തൊന്നും ഇന്ത്യയടക്കമുള്ളവര്‍ക്ക് ഫൈനല്‍ പോരാട്ടത്തിന്റെ വേദിയാകാന്‍ അവസരമില്ലെന്നു ഐസിസി സ്ഥിരീകരിച്ചു.

2031 വരെ ടെസ്റ്റ് ചാംപ്യന്‍ഷിപ്പ് ഫൈനലിന്റെ വേദി ഇംഗ്ലണ്ടായിരിക്കുമെന്നു ഐസിസി വ്യക്തമാക്കി. ഐസിസിയുടെ ഔദ്യോഗിക വാര്‍ത്താക്കുറിപ്പിലാണ് ഇക്കാര്യം വ്യക്തമാക്കിയത്. ഉദ്ഘാടന സീസണ്‍ മുതല്‍, ഫൈനല്‍ പോരാട്ടം ഇംഗ്ലണ്ടിലാണ് നടക്കുന്നത്. അടുത്ത 3 സീസണ്‍ കൂടി ഇത്തരത്തില്‍ തുടരുമെന്നു ഐസിസി അറിയിച്ചു.

കഴിഞ്ഞ മൂന്ന് സീസണുകളിലായി ഇംഗ്ലണ്ടിലെ സതാംപ്ടന്‍ (2021), ദി ഓവല്‍ (2023), ലോര്‍ഡ്‌സ് (2025) മൈതാനങ്ങളിലാണ് കലാശപ്പോര് അരങ്ങേറിയത്. സമാനമായി 2027, 2029, 2031 വര്‍ഷങ്ങളിലും ഇംഗ്ലണ്ടില്‍ തന്നെ ഫൈനല്‍ നടക്കും.

കഴിഞ്ഞ 3 സീസണുകളിലായി ഫൈനല്‍ പോരാട്ടം വിജയകരമായി സംഘടിപ്പിക്കാന്‍ ഇംഗ്ലണ്ട് ആന്‍ഡ് വെയ്ല്‍സ് ക്രിക്കറ്റ് ബോര്‍ഡിനു സാധിച്ചുവെന്നാണ് ഐസിസി വിലയിരുത്തല്‍. മാത്രമല്ല ഫൈനല്‍ നടക്കുന്ന ഘട്ടം ഇംഗ്ലണ്ടില്‍ വേനല്‍ക്കാലത്തിന്റെ തുടക്കമാണെന്ന അധിക ആനുകൂല്യവും അവര്‍ക്ക് ഗുണകരമായി.