ചണ്ഡീ​ഗഢ്: ഇന്ത്യൻ ക്യാപ്റ്റൻ ശുഭ്മാൻ ​ഗില്ലും ഓപ്പണർ അഭിഷേക് ശർമയും ഇന്ത്യക്കായി ഒരുമിച്ച് ഓപ്പൺ ചെയ്തവരാണ്. ഒന്നിച്ച് ഡ്രസിങ് റൂം പങ്കിട്ടവരുമാണ്. മാത്രമല്ല പഞ്ചാബ് ക്രിക്കറ്റിലൂടെ ഒന്നിച്ച് കളിച്ച് വളർന്നവരുമാണ് ഇരുവരും. കഴിഞ്ഞ ദിവസം ഇരുവരും പക്ഷേ നേർക്കുനേർ പോരാടി. ഷേർ ഇ പഞ്ചാബ് ടി20 ലീ​ഗിൽ ഫസിൽക്ക ഫാൽക്കൺസും അമൃത്സർ സോർമാസും ഏറ്റുമുട്ടിയപ്പോഴാണ് കളിക്കൂട്ടുകാർ നേർക്കുനേർ വന്നത്.​ ​ഗിൽ ഫസിൽക്ക താരവും അഭിഷേക് അമൃത്സർ ടീമിനുമായാണ് കളത്തിലെത്തിയത്.

​ഗിൽ ബാറ്റ് ചെയ്തപ്പോൾ അഭിഷേക് താരത്തിനെതിരെ പന്തെറിയുകയും ചെയ്തു. ഈ ഓവറിൽ ആദ്യം മേൽക്കൈ നേടിയത് ​ഗിൽ ആണ്. ഇടംകൈ സ്പിന്നറായ അഭിഷേക് മത്സരത്തിന്റെ പത്താം ഓവർ പന്തെറിയാൻ എത്തിയപ്പോൾ ​ഗില്ലാണ് ക്രീസിലുണ്ടായിരുന്നത്. അഭിഷേകിന്റെ ആദ്യ പന്ത് ​ഗിൽ സിക്സർ തൂക്കി. നേരെ ലോങ് ഓഫിനു മുകളിലൂടെയാണ് ​ഗിൽ പന്ത് പറത്തിയത്. രണ്ടാം പന്തിൽ ഡീപ് മിഡ് വിക്കറ്റിലൂടെ ഫോറും തൂക്കി. ഈ ഓവറിലെ അഞ്ചാം പന്തിൽ ​ഗിൽ അടുത്ത സിക്സും പറത്തി. 6, 4, 6 എന്നായിരുന്നു ​ഗിൽ- അഭിഷേക് പോരിലെ ആദ്യ സീക്വൻസ്.

എന്നാൽ അവസാന പന്തിൽ അഭിഷേക് പകരം വീട്ടി. വീണ്ടുമൊരു വലിയ ഷോട്ടിനു ശ്രമിച്ച ​ഗില്ലിനെ അഭിഷേക് നമാൻ ധിറിന്റെ കൈകളിൽ എത്തിച്ച് പുറത്താക്കി. 35 പന്തിൽ 8 ഫോറും 3 സിക്സും സഹിതം 67 റൺസെടുത്താണ് ​ഗിൽ മടങ്ങിയത്. മത്സരത്തിൽ ഫസിൽക്ക ഫാൽക്കൺസ് 20 ഓവറിൽ 6 വിക്കറ്റ് നഷ്ടത്തിൽ 191 റൺസെടുത്തു.

192 റൺസ് വിജയ ലക്ഷ്യത്തിലേക്ക് ബാറ്റേന്തിയ അമൃത്സറിനായി അഭിഷേക് മികച്ച ബാറ്റിങിലൂടെ മിന്നും തുടക്കം നൽകി. സഹജ് ധവാനൊപ്പം ഓപ്പണിങിൽ 79 റൺസ് ചേർത്താണ് താരം മടങ്ങിയത്. 15 പന്തിൽ 4 സിക്സും 6 ഫോറും സഹിതം അഭിഷേക് 49 റൺസുമായി മടങ്ങി. ഇടയ്ക്ക് ഫസിൽക്ക ഫാൽക്കൺസ് മത്സരത്തിൽ പിടിമുറുക്കിയെങ്കിലും 4 പന്തുകൾ ശേഷിക്കെ അമൃത്സർ മത്സരം വിജയിച്ചു.

മത്സരത്തിൽ ഏറ്റവും ഉയർന്ന വ്യക്തി​ഗത സ്കോർ ​ഗില്ലിന്റെ വകയായിരുന്നു. 67 റൺസ്. അമൃത്സർ സോർമാസിന്റെ വിജയത്തിൽ അഭിഷേകിന്റെ 49 റൺസ് മികച്ച അടിത്തറയായി. ജയത്തോടെ അവരുടെ സെമി പ്രതീക്ഷകളും സജീവമായി.