നടപടി ദുരൂഹമെന്ന് മന്ത്രി ലിജു, വിദ്യാർഥികൾക്ക് തിരിച്ചടി, ഒരിടവും കൈയടക്കി വെക്കാനാവില്ലെന്ന് കോടതി; ഇന്നത്തെ 5 പ്രധാന വാർത്തകൾ

സര്‍ക്കാര്‍ അറിയാതെ മൂന്നു ബാറുകള്‍ക്ക് ലൈസന്‍സ് നല്‍കിയ ഉദ്യോഗസ്ഥ നടപടിയില്‍ മന്ത്രി ലിജുവിന് അതൃപ്തി. എക്‌സൈസ് കമ്മീഷണറുടെ നടപടി ദുരൂഹമെന്ന് മന്ത്രി കുറ്റപ്പെടുത്തി. കാലടിയില്‍ സസ്പെന്‍ഷനിലുള്ള വിദ്യാര്‍ഥികളെ പരീക്ഷ എഴുതാന്‍ അനുവദിച്ച സിംഗിള്‍ ബെഞ്ച് ഉത്തരവ് ഹൈക്കോടതി റദ്ദാക്കി. ഇന്നത്തെ 5 പ്രധാന വാര്‍ത്തകള്‍ ( Top 5 News Today ) അറിയാം.

എക്സൈസ് കമ്മീഷണർ സാംബശിവ റാവുവിൻറെ നടപടികൾ ദുരൂഹമാണെന്നും വകുപ്പിന് നാണക്കേടുണ്ടാക്കുന്നതാണെന്നും മന്ത്രി എം ലിജു. ബാറുകൾക്ക് അനുമതി നൽകുന്ന കാര്യം സർക്കാരിനെ അറിയിക്കണമായിരുന്നു. നെടുമ്പാശ്ശേരി വിമാനത്താവളത്തിൽ പുതിയ ബാറുകൾക്ക് അനുമതി നൽകിയ വിവാദത്തിൽ ഈ ലൈസൻസ് റദ്ദാക്കുമെന്നും ഇതിനായി നിയമോപദേശം തേടിയിട്ടുണ്ടെന്നും മന്ത്രി കൂട്ടിച്ചേർത്തു.

കാലടി ശ്രി ശങ്കരാചാര്യ സര്‍വകലാശാലയില്‍ സസ്‌പെന്‍ഷനിലുള്ള വിദ്യാര്‍ഥികളെ പരീക്ഷ എഴുതാന്‍ അനുവദിച്ച സിംഗിള്‍ ബെഞ്ച് ഉത്തരവ് ഹൈക്കോടതി റദ്ദാക്കി. സര്‍വകലാശാല വൈസ് ചാന്‍സിലര്‍ സിസ തോമസ് നല്‍കിയ അപ്പീലിലാണ് ഡിവിഷന്‍ ബെഞ്ച് വിധി. സിംഗിള്‍ ബെഞ്ച് വിധി സര്‍വകലാശാല ചട്ടങ്ങള്‍ക്ക് വിരുദ്ധമാണെന്ന് വിലയിരുത്തിയാണ് ഡിവിഷന്‍ ബെഞ്ച് നടപടി.

രാഹുല്‍ മാങ്കൂട്ടത്തിലിന് ചില കാലിടര്‍ച്ചകള്‍ സംഭവിച്ചെന്നും ശോഭനമായ ഭാവി ഉണ്ടായിരുന്ന രാഹുല്‍ പാര്‍ട്ടിയിലേയ്ക്ക് അധികം വൈകാതെ തിരികെ വരുമെന്നും മുന്‍ മന്ത്രി കെ ബാബു. അദ്ദേഹത്തിന് ചില തെറ്റുകള്‍ പറ്റി എന്നത് ശരിതന്നെ. സംഭവിച്ച കാര്യങ്ങള്‍ അങ്ങേയറ്റം ദുഃഖകരമാണ്. എന്നാല്‍ ആയുഷ്‌ക്കാലം മുഴുവന്‍ ഒരാളെ പുറത്തു നിര്‍ത്താന്‍ പാര്‍ട്ടിയ്ക്ക് കഴിയില്ല. ജീവപര്യന്തം തടവുശിക്ഷ പോലെ എക്കാലത്തേക്കും രാഹുലിനെ മാറ്റി നിര്‍ത്താന്‍ കഴിയില്ലെന്ന് ബാബു സമകാലിക മലയാളത്തോട് പറഞ്ഞു.

 പ്രതിഷേധങ്ങള്‍ നടത്താനായി ഒരു സ്ഥലം അനിശ്ചിതകാലത്തേക്ക് കൈയേറാന്‍ ആര്‍ക്കും കഴിയില്ലെന്ന് സുപ്രീം കോടതി. പ്രതിഷേധങ്ങള്‍ക്ക് നിശ്ചിത സ്ഥലവും സമയവും വേണമെന്ന് കോടതി നിര്‍ദേശിച്ചു. കേന്ദ്ര തെരഞ്ഞെടുപ്പ് കമ്മീഷനെതിരെ പ്രതിപക്ഷ പാര്‍ട്ടികളും മറ്റുള്ളവരും ചേര്‍ന്ന് ഡല്‍ഹിയിലെ ജന്തര്‍ മന്തറില്‍ സംഘടിപ്പിച്ച പ്രതിഷേധത്തെക്കുറിച്ചുള്ള ഹര്‍ജി പരിഗണിക്കവേയാണ് കോടതിയുടെ ഈ നിരീക്ഷണം. ഹര്‍ജിയില്‍ വ്യാപാരികളെ കൂടി കക്ഷി ചേര്‍ക്കാന്‍ സുപ്രീം കോടതി നിര്‍ദേശിച്ചു. 

പ്രശസ്ത സിനിമ മേക്കപ്പ്മാന്‍ പാണ്ഡ്യന്‍ അന്തരിച്ചു. 74 വയസ്സായിരുന്നു. ചെന്നൈ വിരുഗമ്പാക്കത്തെ വസതിയിലായിരുന്നു അന്ത്യം. നടന്‍ സത്യന്റെ പേഴ്‌സണല്‍ മേക്കപ്പ്മാനായ കൃഷ്ണരാജന്റെ സഹായിയായി തന്റെ പതിനാറാം വയസ്സിലാണ് തമിഴ്നാട് സ്വദേശിയായ പാണ്ഡ്യന്‍ മലയാളസിനിമയിലേക്ക് പ്രവേശിക്കുന്നത്. കമല്‍, സത്യന്‍ അന്തിക്കാട്, ജോഷി തുടങ്ങിയ സംവിധായകരുടെ ചിത്രങ്ങളിലെ സ്ഥിരം ചമയക്കാരനായിരുന്നു