അഹമ്മദാബാദ്: ഗുജറാത്തില്‍ പ്രകടന പത്രികയില്ലാതെ തിരഞ്ഞെടുപ്പിനെ നേരിടുന്ന ബിജെപിക്കു നേരെ കടുത്ത വിമര്‍ശനവുമായി പട്ടീദാര്‍ നേതാവ് ഹര്‍ദിക് പട്ടേല്‍. സെക്‌സ് സിഡി നിര്‍മിക്കുന്ന തിരക്കില്‍ ബിജെപി പ്രകടനപത്രികയുണ്ടാക്കാന്‍ മറന്നുപോയെന്ന് ഹര്‍ദിക് പട്ടേല്‍ പരിഹസിച്ചു. തിരഞ്ഞെടുപ്പിനു തലേന്നാണ് പ്രകടനപത്രികയില്ലാത്തതിന് ബിജെപിയെ പ്രതിരോധത്തിലാക്കി ഹര്‍ദിക് രംഗത്തുവന്നത്.
ഹിന്ദിയില്‍ ട്വിറ്ററില്‍ പോസ്റ്റു ചെയ്ത സന്ദേശത്തിലാണ് ഹര്‍ദിക് പട്ടേല്‍ കടുത്ത പരിഹാസം ഉന്നയിച്ചത്. ഹര്‍ദിക് പട്ടേലുമായി സാമ്യമുള്ളയാള്‍ ഉള്‍പ്പെട്ട ലൈംഗിക സിഡി പുറത്തിറങ്ങിയ സംഭവത്തെ സൂചിപ്പിച്ചാണ് പട്ടേലിന്റെ പരിഹാസം. ഇതിന് പിന്നില്‍ ബിജെപി ആണെന്നു നേരത്തെ ആക്ഷേപം ഉയര്‍ന്നിരുന്നു.
നേരത്തേ കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയും പ്രകടനപത്രിക ഇല്ലാത്തതിന് ബിജെപിയെ വിമര്‍ശിച്ചിരുന്നു. പ്രകടന പത്രിക പുറത്തിറക്കാതെ ഗുജറാത്തിലെ ജനങ്ങളെ അവഹേളിക്കുകയാണ് ബിജെപി എന്ന് രാഹുല്‍ ട്വീറ്റ് ചെയ്തത്. പ്രകടന പത്രികയില്ലാതെയാണ് ആദ്യ ഘട്ടത്തിന്റെ പ്രചാരണം സമാപിച്ചത്. ഗുജറാത്തിന് വേണ്ടി ദര്‍ശനങ്ങളോ ആശയങ്ങളോ അവര്‍ പ്രചരിപ്പിച്ചില്ലെന്നും രാഹുല്‍ കുറ്റപ്പെടുത്തി.
അതേസമയം പ്രകടന പത്രികയല്ല, ദര്‍ശന രേഖയാണ് പാര്‍ട്ടി പുറത്തിറക്കിയത് എന്നാണ് ബിജെപിയുടെ വാദം. അഞ്ചു വര്‍ഷത്തേക്ക് ചെയ്യാനുള്ള കാര്യങ്ങളല്ല, നയസമീപന രീതിയാണ് ദര്‍ശന രേഖയിലുള്ളതെന്നും പാര്‍ട്ടി നേതാക്കള്‍ പറയുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
