ന്യൂഡല്‍ഹി: പാര്‍ട്ടി ജനപ്രതിനിധികള്‍ വിവാദ പ്രസ്താവനകളില്‍ നിന്നും അകന്നു നില്‍ക്കണമെന്ന പ്രധാനമന്ത്രി നരേന്ദ്രമാദിയുടെ ഉപദേശം കാറ്റില്‍ പറത്തി ബിജെപി എംഎല്‍എ. പാര്‍ട്ടി എംപിമാരുടെയും എംഎല്‍എമാരുടെയും വിവാദ പ്രസ്താവനകള്‍ ബിജെപിയെ പ്രതിരോധത്തിലാക്കുന്ന പശ്ചാത്തലത്തിലായിരുന്നു മോദിയുടെ നിര്‍ദേശം. ഈ നിര്‍ദേശം പുറത്ത് വന്ന് ദിവസങ്ങള്‍ക്കകമാണ് യോഗി ആദിത്യനാഥിന്റെ നാട്ടില്‍ നിന്നുളള എംഎല്‍എ മോദിയുടെ വാക്കുകളെ നിരാകരിച്ച് രംഗത്തുവന്നത്.
പശ്ചിമ ബംഗാള്‍ മുഖ്യമന്ത്രി മമത ബാനര്‍ജിയെ വിമര്‍ശിച്ച് ഉത്തര്‍പ്രദേശ് ബൈറിയയില്‍ നിന്നുളള ബിജെപി എംഎല്‍എ സുരേന്ദ്ര സിങ് നടത്തിയ പരാമര്‍ശമാണ് വിവാദമായത്. മമതയെ പുരാണത്തിലെ ശൂര്‍പ്പണഖയോട് താരതമ്യം ചെയ്ത എംഎല്‍എ ഇവരുടെ മൂക്ക് മോദിയും അമിത് ഷായും ചേര്‍ന്ന് ഛേദിക്കുമെന്നും കൂടി പറഞ്ഞ് ഒരു പടി കൂടി കടന്നു. കോണ്‍ഗ്രസ് രാവണനെ പോലെയാണ് പ്രവര്‍ത്തിക്കുന്നതെന്നും അദ്ദേഹം കുറ്റപ്പെടുത്തി.
പശ്ചിമബംഗാളില്‍ തൃണമൂല്‍ അനുകൂലികള്‍ വ്യാപകമായി അക്രമം അഴിച്ചുവിടുന്ന പശ്ചാത്തലത്തിലാണ് എംഎല്‍എയുടെ പ്രതികരണം. ഇത് തടയുന്നതിന് മുഖ്യമന്ത്രിയായ മമത ഒന്നും തന്നെ ചെയ്യുന്നില്ലെന്നും എംഎല്‍എ ആരോപിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
