ന്യൂഡെൽഹി: കേന്ദ്ര സർക്കാരിനു നേരെ രൂക്ഷവിമർശനവുമായി കോണ്ഗ്രസ് മുൻ അധ്യക്ഷ സോണിയ ഗാന്ധി. ഇപ്പോൾ രാജ്യം ഭരിക്കുന്ന ബിജെപിക്കാർ ജവഹർലാൽ നെഹ്റുവിന്റെ പാരമ്പര്യം നശിപ്പിച്ചെന്നും ഇവർ രാജ്യത്തിന് അപമാനമാണെന്നും സോണിയ പറഞ്ഞു. കോണ്ഗ്രസ് നേതാവ് ശശി തരൂരിന്റെ നെഹ്റു-ദി ഇൻവെൻഷൻ ഓഫ് ഇന്ത്യ എന്ന പുസ്തകത്തിന്റെ പുനപ്രകാശന ചടങ്ങിൽ സംസാരിക്കുന്നതിനിടെയാണ് സോണിയ ബിജെപിക്കെതിരെ പരാമർശം നടത്തിയത്.
''ഇന്ത്യയിലെ ജനാധിപത്യത്തെ ഏകീകരിക്കുകയും അടിസ്ഥാനമൂല്യങ്ങളെ ഉറപ്പിക്കുകയും ചെയ്തത് ആദ്യ പ്രധാനമന്ത്രിയായ നെഹ്റുവാണ്. ആ മൂല്യങ്ങളിലാണ് ഇന്ത്യ ഇന്നും അഭിമാനിക്കുന്നത്. ഭരണഘടനാ സ്ഥാപനങ്ങൾ, മതനിരപേക്ഷത, സോഷ്യലിസ്റ്റ് സാമ്പത്തിക നയങ്ങൾ, ചേരിചേരാ നയം എന്നിവയൊക്കെ നെഹ്റു സൃഷ്ടിച്ച മൂല്യങ്ങളാണ്. ഇന്ത്യയുടെ അടിസ്ഥാന കാഴ്ചപ്പാടായ ഈ മൂല്യങ്ങൾ ഇന്നു ചോദ്യം ചെയ്യപ്പെടുന്നു. അദ്ദേഹത്തിന്റെ പാരമ്പര്യങ്ങൾ ഇന്ന് രാജ്യം ഭരിക്കുന്നവർ ഓരോ ദിവസവും നശിപ്പിക്കുന്നു''- സോണിയ പറഞ്ഞു. ജനാധിപത്യത്തെ നശിപ്പിക്കാൻ ഇറങ്ങിത്തിരിച്ചവരോട് നിശ്ചയദാർഡ്യത്തോടെ പോരാടി രാജ്യത്തെ സുരക്ഷിതമാക്കിയ നെഹ്റുവിന് അർഹമായ ബഹുമാനം നമ്മൾ നൽകേണ്ടതുണ്ടെന്നും സോണിയ ഗാന്ധി കൂട്ടിച്ചേർത്തു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ