ന്യൂഡൽഹി: വരുന്ന ലോക്സഭ തെരഞ്ഞെടുപ്പിൽ കോൺഗ്രസ് അധ്യക്ഷൻ രാഹുൽ ഗാന്ധിയെ പ്രധാനമന്ത്രി സ്ഥാനാർത്ഥിയായി ഉയർ‌ത്തി കാണിക്കില്ലെന്ന് മുതിർന്ന പാർട്ടി നേതാവ് പി ചിദംബരം. ബിജെപിയെ പുറത്താക്കാൻ പ്രാദേശിക പാർട്ടികളുമായി ചേർന്ന് മഹാസഖ്യം രൂപികരിക്കാനാണ് കോൺഗ്രസ് മുഖ്യമായി ശ്രമിക്കുന്നത്. പ്രധാനമന്ത്രിയെ തീരുമാനിക്കുന്നതെല്ലാം തെരഞ്ഞെടുപ്പിന് ശേഷം സഖ്യകക്ഷികൾ ചേർന്ന് സ്വീകരിക്കുമെന്നും ചിദംബരം വ്യക്തമാക്കി.
രാഹുലിനെയോ മറ്റ് നേതാക്കളെയോ പ്രധാനമന്ത്രി സ്ഥാനാർഥിയായി നിർത്തി വോട്ട് തേടാൻ കോണ്ഗ്രസ് ഒരുക്കമല്ലെന്നും അദ്ദേഹം പറഞ്ഞു. രാഹുൽ ഗാന്ധിയെ പ്രധാനമന്ത്രി സ്ഥാനാർത്ഥിയായി ഉയർത്തിക്കാണിക്കുമെന്ന് തങ്ങൾ ഒരിക്കലും പറഞ്ഞിട്ടില്ല. ചില കോണ്ഗ്രസ് പ്രവർത്തകർ അതിനെ കുറിച്ച് സംസാരിച്ചപ്പോൾ എഐസിസി ഇടപെട്ട് അത്തരം ചർച്ചകൾ അവസാനിപ്പിച്ചുവെന്നും അദ്ദേഹം പറഞ്ഞു.
ബിജെപിയെ പുറത്താക്കണമെന്നാണ് കോണ്ഗ്രസ് ആഗ്രഹിക്കുന്നത്. കോൺഗ്രസുമായി സഹകരിക്കാൻ തയാറാകുന്ന പ്രാദേശിക പാർട്ടികളെ നരേന്ദ്രമോദി സർക്കാർ ഭീഷണിയിലൂടെ പിന്തിരിപ്പിക്കുകയാണെന്നും ചിദംബരം ആരോപിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
