നെടുങ്കണ്ടം: വൈകുന്നേരം ബസ് ഇറങ്ങുമ്പോള്‍ തലയെടുപ്പോടെ അവിടെ നിന്നിരുന്നതാണ്. പക്ഷേ രാവിലെ എത്തിയപ്പോള്‍ പൊടി പോലും കാണുന്നില്ല. ഇടുക്കി നെടുങ്കണ്ടത്ത് വെയിറ്റിങ് ഷെഡ് ഒന്നടങ്കം അടിച്ചുകൊണ്ടുപോയിരിക്കുകയാണ് കള്ളന്മാര്‍. ബാലഗ്രാം ടൗണില്‍ പാമ്പാടുംപാറ പഞ്ചായത്ത് സ്ഥാപിച്ചിരുന്ന ബസ് കാത്തിരിപ്പുകേന്ദ്രമാണ് കഴിഞ്ഞ ദിവസം രാത്രിയില്‍ കള്ളന്മാര്‍ മോഷ്ടിച്ചത്.
വെയിറ്റിങ് ഷെഡിന്റെ നവീകരണത്തിനായി അരലക്ഷം രൂപ പഞ്ചായത്ത് അനുവദിച്ചതിന് പിന്നാലെയാണ് മോഷണം നടന്നിരിക്കുന്നത്. കാത്തിരിപ്പു കേന്ദ്രത്തിന്റെ മേല്‍ക്കൂരയും ഇരുമ്പു തൂണുകളുമാണ് ഒറ്റരാത്രികൊണ്ട് അപ്രത്യക്ഷമായത്. ഇപ്പോള്‍ വെയിറ്റിംങ് ഷെഡിന്റെ തറ മാത്രമാണ് അവശേഷിക്കുന്നത്.
എട്ട് വര്‍ഷം മുന്‍പാണ് പാമ്പാടുംപാറ പഞ്ചായത്ത് കാത്തിരിപ്പുകേന്ദ്രം സ്ഥാപിച്ചത്. എന്തായാലും വെയിറ്റിംങ് ഷെഡില്‍ മൊത്തമായി അടിച്ചുമാറ്റിയ വിരുതന്‍ നാട്ടുകാരെ ആകെ ഞെട്ടിച്ചിരിക്കുകയാണ്. സംഭവത്തെക്കുറിച്ച് അന്വേഷിക്കണം എന്നാവശ്യപ്പെട്ട് പാമ്പാടുംപാറ പഞ്ചായത്ത് പ്രസിഡന്റ് ആരിഫാ അയൂബ് നെടുംകണ്ടം പൊലീസിന് പരാതി നല്‍കി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
