എലിസബത്ത് രാജ്ഞിയുടെ റോള്‍സ് റോയ്സ് ലേലത്തിന്; 40 വർഷമായി രാജ കുടുംബം സൂക്ഷിക്കുന്നു
ലണ്ടന്‍: ഒരു കാലത്ത് പ്രൗഢിയുടെ തലയെടുപ്പുമായി ലണ്ടൻ നഗരം കീഴടക്കിയ എട്ട് രാജകീയ ആഡംബര കാറുകൾ ലേലത്തിനെത്തുന്നു. എലിസബത്ത് രാജ്ഞിയുടെ റോള്‍സ് റോയ്സ് അടക്കം ബ്രിട്ടീഷ് രാജകുടുംബത്തിന്‍റെ എട്ട് അമൂല്യ കാറുകളാണ് ലേലത്തിനെത്തുന്നു. റോള്‍സ് റോയ്സിന്‍റെ 1953 മോഡല്‍ ഫാന്‍റം നാല് ആണ് ഇതില്‍ ഏറ്റവും വലിയ താരം. രാജ്ഞിയുടെ ഔദ്യോഗിക വാഹനമായിരുന്നു ഇത്. 1960 മോഡല്‍ ഫാന്‍റം ഫൈവ് റോള്‍സ് റോയ്സ്, 1964 മോഡല്‍ ഫെറാരി 250 ജിടി ലസോ, ബുഗാട്ടി ടൈപ്പ് 30 കാറുകളും ലേലത്തിനു വയ്ക്കുന്നവയില്‍ ഉള്‍പ്പെടുന്നു. അടുത്ത മാസം ബോണ്‍ഹാംസ് കമ്പനിയാണു ലേലം നടത്തുന്നത്. എല്ലാറ്റിനുംകൂടി 64 ലക്ഷം ഡോളര്‍ വില പ്രതീക്ഷിക്കുന്നു. നാല്പതു വര്‍ഷമായി രാജകുടുംബം സൂക്ഷിക്കുന്ന റോള്‍സ് റോയ്സിന്‍റെ ഫാന്‍റം നാലിന് മാത്രം 26 ലക്ഷം ഡോളര്‍ വില കിട്ടുമെന്ന് കരുതുന്നു. കേവലം 18 ഫാന്‍റം നാല് മോഡല്‍ കാറുകളേ നിര്‍മിക്കപ്പെട്ടിട്ടുള്ളൂ. രാജ്യത്തലവന്മാര്‍ക്കും മറ്റ് ഉന്നതാധികാരികള്‍ക്കുംവേണ്ടി പ്രത്യേകം തയാറാക്കപ്പെട്ട ഈ കാറുകള്‍ ഓരോന്നും വ്യത്യസ്തമാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
