കേന്ദ്ര വ്യവസായ മന്ത്രാലയത്തിന് കീഴിലുള്ള ചിക്കമംഗളൂരുവിൽ സ്ഥിതി ചെയ്യുന്ന സെൻട്രൽ കോഫി റിസർച്ച് ഇൻസ്റ്റിറ്റ്യൂട്ട് (CCRI) ഡിപ്ലോമ ഇൻ കോഫി എസ്റ്റേറ്റ് മാനേജ്മെന്റ് (DCEM) കോഴ്സിലേക്ക് അപേക്ഷ ക്ഷണിച്ചു. രണ്ട് വർഷമാണ് കോഴ്സിന്റെ കാലാവധി.

കോഫി തോട്ടങ്ങളുടെ ശാസ്ത്രീയ പരിപാലനം, ഉൽപ്പാദനക്ഷമത വർധിപ്പിക്കൽ, ഗുണനിലവാര നിയന്ത്രണം, ആധുനിക കൃഷിരീതികൾ എന്നിവയിൽ പ്രൊഫഷണൽ പരിശീലനം നൽകുന്ന കോഴ്സാണിത്.

കോഫി എസ്റ്റേറ്റ് മാനേജ്മെന്റ് മേഖലയിലെ വിദഗ്ധരെ വളർത്തിയെടുക്കുക എന്ന ലക്ഷ്യത്തോടെയാണ് പരിശീലന പരിപാടി നടത്തുന്നത്. ക്ലാസ് റൂം പഠനത്തോടൊപ്പം കോഫി തോട്ടങ്ങളിൽ നേരിട്ടുള്ള ഹാൻഡ്‌സ്-ഓൺ ഫീൽഡ് ട്രെയിനിംഗും വിദ്യാർഥികൾക്ക് ലഭിക്കും.

കോഫി കൃഷിയിലെ മികച്ച കാർഷിക രീതികൾ, തൈകളുടെ തിരഞ്ഞെടുപ്പ്, തോട്ട പരിപാലനം, രോഗ-കീട നിയന്ത്രണം, വിളവെടുപ്പ്, ഗുണനിലവാര വിലയിരുത്തൽ, പ്രോസസ്സിങ്, എസ്റ്റേറ്റ് ഭരണനിർവഹണം എന്നിവയെക്കുറിച്ചുള്ള സമഗ്ര പരിശീലനവും കോഴ്സിന്റെ ഭാഗമാണ്.

വിദ്യാഭ്യാസ യോഗ്യത: പന്ത്രണ്ടാം ക്ലാസ്

പ്രായപരിധി: 18 മുതൽ 35 വയസ്സ് വരെ.

കോഴ്സ് കാലാവധി: രണ്ട് വർഷം

സീറ്റുകളുടെ എണ്ണം: ആകെ 10 സീറ്റുകൾ മാത്രം.

താമസം: കോഫി റിസർച്ച് ഇൻസ്റ്റിറ്റ്യൂട്ടിൽ സൗജന്യ താമസം ലഭിക്കും.

ഫീസും സ്റ്റൈപ്പൻഡും

• കോഴ്സ് ഫീ: പൊതുവിഭാഗത്തിന് 25,000 രൂപ. (SC/ST/EWS വിഭാഗക്കാർക്ക് 20,000 രൂപ). ഫീസ് രണ്ട് ഗഡുക്കളായി അടയ്ക്കാം.

• സ്റ്റൈപ്പൻഡ്: ഒന്നാം വർഷത്തിൽ സാമ്പത്തികമായി പിന്നാക്കം നിൽക്കുന്നവർക്കും (EWS) SC/ST ഉദ്യോഗാർത്ഥികൾക്കും പ്രതിമാസം 6,000 രൂപ സ്റ്റൈപ്പൻഡ് ലഭിക്കും. രണ്ടാം വർഷത്തിൽ എല്ലാ ഉദ്യോഗാർത്ഥികൾക്കും പ്രതിമാസം 10,000 രൂപ വീതം സ്റ്റൈപ്പൻഡ് നൽകുന്നതാണ്.

അപേക്ഷിക്കേണ്ട വിധം

അപേക്ഷാ ഫോം Coffee Board-ന്റെ ഔദ്യോഗിക വെബ്സൈറ്റിൽ നിന്ന് ഡൗൺലോഡ് ചെയ്ത് പൂരിപ്പിക്കണം.

പൂരിപ്പിച്ച അപേക്ഷയും അനുബന്ധ രേഖകളും ''Director of Research, Central Coffee Research Institute, Coffee Research Station – 577117, Chikkamagaluru District, Karnataka'' എന്ന വിലാസത്തിൽ 2026 ജൂലൈ 31-നകം ലഭിക്കണം.

കവറിന് മുകളിൽ "Application for Diploma in Coffee Estate Management" എന്ന് രേഖപ്പെടുത്തണം.

കോഫി എസ്റ്റേറ്റുകൾ, കാപ്പി ഉൽപ്പാദന സ്ഥാപനങ്ങൾ, കാർഷിക സംരംഭങ്ങൾ, കയറ്റുമതി സ്ഥാപനങ്ങൾ, കോഫി പ്രോസസ്സിങ് യൂണിറ്റുകൾ എന്നിവിടങ്ങളിൽ തൊഴിൽ നേടാൻ ഈ കോഴ്സ് സഹായകമാകും. സ്വന്തമായി കോഫി കൃഷിയോ പ്ലാന്റേഷൻ മാനേജ്മെന്റോ ആരംഭിക്കാൻ ആഗ്രഹിക്കുന്നവർക്കും ഈ പരിശീലനം പ്രയോജനപ്പെടും.