മഴക്കാലത്ത് വീടിനുള്ളിൽ പലവിധ ബുദ്ധിമുട്ടുകളും ഉണ്ടാക്കാറുണ്ട്. നനഞ്ഞതോ ഈർപ്പം നിൽക്കുന്നതോ ആയ തറ, ​ദുർ​ഗന്ധം, വരാന്തയിൽ നിരന്തരം നിറയുന്ന ചെളി, തുണി ഉണങ്ങാനുള്ള പ്രയാസം അങ്ങനെ നീളുന്നു ആവലാതികൾ. എന്നാൽ ചില കാര്യങ്ങൾ പിന്തുടർന്നാൽ ഈ ഈർപ്പവും അഴുക്കും ഒഴിവാക്കി വീട് എപ്പോഴും വൃത്തിയും സുരക്ഷിതവുമായി നിലനിർത്താം.

ഈർപ്പം നിയന്ത്രിക്കുക

മഴക്കാലത്ത് മുറിയിലുണ്ടാകുന്ന മുഷിഞ്ഞ മണവും ഈർപ്പവുമാണ് പ്രധാന വില്ലൻ. എന്നാൽ ചില കാര്യങ്ങൾ ചെയ്ത് ശീലിച്ചാൽ ഈർപ്പത്തെ നിയന്ത്രിക്കാൻ കഴിയും.

• തറയിൽ വെള്ളം വീണാൽ ഉടൻ തന്നെ തുടച്ചു മാറ്റുക.

• പ്രധാനവാതിലിന് വെളിയിലും അകത്തുമായി രണ്ട് ഡോർ മാറ്റുകൾ ഉപയോഗിക്കുക. ഇത് ചെളിയും ഈർപ്പവും ഉള്ളിലേക്ക് കടക്കുന്നത് തടയും.

• ഈർപ്പമുള്ള തുണികളോ തോർത്തുകളോ അടഞ്ഞ മുറികളിൽ ഇടരുത്.

• ഉപയോഗത്തിന് ശേഷം ബാത്ത്റൂം തറകൾ പരമാവധി ഉണക്കി സൂക്ഷിക്കുക. (വൈപ്പറുകൾ ഉപയോഗിച്ച് വെള്ളം നീക്കാം.)

• വെയിൽ വരുന്ന സമയങ്ങളിൽ വാർഡ്രോബുകളും കബോർഡുകളും അല്പസമയം തുറന്നിട്ട് കാറ്റും വെളിച്ചവും കടത്തിവിടുക.

അടുക്കളയും ബാത്ത്റൂമും

• മഴക്കാലത്ത് ബാത്ത്റൂമിലും അടുക്കളയിലുമാണ് ഏറ്റവും കൂടുതൽ ഈർപ്പം തങ്ങിനിൽക്കുന്നത്. ഇത് ഫംഗസും അഴുക്കും രൂപപ്പെടാൻ കാരണമാകുന്നു.

• ബാത്ത്റൂം ടൈലുകൾ, ഇടയിലെ വരകൾ (grout lines), ടാപ്പുകൾ എന്നിവ പതിവായി വൃത്തിയാക്കുക.

• പാചകത്തിന് ശേഷം അടുക്കളയിലെ കൗണ്ടർടോപ്പുകളും സിങ്കിന് ചുറ്റുമുള്ള ഭാഗങ്ങളും നന്നായി തുടയ്ക്കുക.

• സിങ്കിന് അടിയിലോ പൈപ്പുകളിലോ അറ്റകുറ്റപ്പണികളോ ചെറിയ ചോർച്ചയോ ഇല്ലെന്ന് ഉറപ്പുവരുത്തുക.

തറ പരിപാലനം

മഴയുള്ളപ്പോൾ പുറത്തുനിന്നുള്ള ചെളിയും മണ്ണും പെട്ടെന്ന് വീടിനുള്ളിലേക്ക് എത്തും. ഇതിനാൽ മോപ്പ് ചെയ്യുന്നതിന് മുൻപ് തറ നന്നായി തൂക്കുകയോ വാക്വം ചെയ്യുകയോ ചെയ്യുക. ഇല്ലെങ്കിൽ ചെളി തറയിലാകെ പടരാൻ സാധ്യതയുണ്ട്. നിങ്ങളുടെ വീടിന്റെ ഫ്ലോറിങ് ടൈപ്പിന് അനുയോജ്യമായ അളവിൽ മാത്രം വെള്ളം ഉപയോഗിച്ച് മോപ്പ് ചെയ്യുക.

പ്രൊഫഷണൽ ഡീപ്പ് ക്ലീനിങ്

ദൈനംദിന ശുചീകരണം കൊണ്ട് മാത്രം മാറ്റാൻ കഴിയാത്ത വിധം അഴുക്കും ഈർപ്പവും അടിഞ്ഞുകൂടുമ്പോൾ ഒരു പ്രൊഫഷണൽ ഡീപ്പ് ക്ലീനിങ് സഹായകരമാകും. പ്രത്യേകിച്ച് മഴക്കാലത്തിന് മുൻപോ, തുടർച്ചയായ മഴയ്ക്ക് ശേഷമോ, ഇങ്ങനെ ചെയ്യുന്നത് വീടിന് ഒരു പുതിയ ലുക്ക് നൽകും.