ന്യൂഡൽഹി: മരുന്നോ ശസ്ത്രക്രിയയോ ഇല്ലാതെ അൽഷിമേഴ്സ് രോ​ഗികളിൽ ഓർമശക്തി വീണ്ടെടുക്കാൻ ഫലപ്രദമായ ചികിത്സരീതി കണ്ടെത്തിയതായി ക്വീൻസ്‌ലാൻഡ് ബ്രെയിൻ ഇൻസ്റ്റിറ്റ്യൂട്ട് ​ഗവേഷകർ. നിലവിൽ അൽഷിമേഴ്സിന് ചികിത്സയില്ല. രോ​ഗത്തിന്റെ പുരോ​ഗതി തടയുന്നതിനും രോ​ഗലക്ഷണങ്ങൾ ലഘൂകരിക്കുന്നതിനും ചികിത്സകളുണ്ടെങ്കിലും അൽ‌ഷിമേഴ്സ് പൂർണമായും ഭേദമാക്കാൻ സാധിച്ചിരുന്നില്ല.

അൾട്രാസൗണ്ട് തെറാപ്പി അൽഷിമേഴ്‌സ് രോഗികളിൽ വൈജ്ഞാനിക പ്രവർത്തനം ഫലപ്രദമായി മെച്ചപ്പെടുത്താൻ സഹായിക്കുമെന്ന് ക്യുബിഐയിലെ ക്ലെം ജോൺസ് സെന്റർ ഫോർ ഏജിങ് ഡിമെൻഷ്യ റിസർച്ച് ​ഗവേഷകർ കണ്ടെത്തി. മോളിക്യുലാർ സൈക്യാട്രിയിലാണ് പഠനം പ്രസിദ്ധീകരിച്ചിരിക്കുന്നത്.

എലികളിൽ നടത്തിയ പരീക്ഷണത്തിൽ കുറഞ്ഞ തീവ്രതയുള്ള അൾട്രാസൗണ്ട് ഫലപ്രദമായി തലച്ചോറിലെ വൈജ്ഞാനികശേഷി പുനഃസ്ഥാപിച്ചതായി ഗവേഷകർ കണ്ടെത്തി. ലോകമെമ്പാടുമുള്ള ദശലക്ഷക്കണക്കിന് അൽഷിമേഴ്സ് രോ​ഗികൾക്ക് പ്രതീക്ഷ നൽകുന്നതാണ് ഈ കണ്ടെത്തൽ.

എട്ട് മണിക്കൂര്‍ തികച്ചുറങ്ങിയിട്ടു കാര്യമില്ല, ഉറങ്ങാനുമുണ്ട് 'ഗോള്‍ഡന്‍ അവര്‍', ദീര്‍ഘായുസ്സ് വര്‍ധിക്കും

പ്രായമായവരിൽ വൈജ്ഞാനിക ശേഷി വർദ്ധിപ്പിക്കുന്നതിനുള്ള ഒരു നോൺ-ഇൻവേസിവ് മാർഗമാണ് തെറാപ്പിക് അൾട്രാസൗണ്ടെന്ന് ഗവേഷകര്‍ പറയുന്നു. അൽഷിമേഴ്‌സ് രോഗമുള്ളവരിൽ പ്ലാക്കുകളും സങ്കീർണതകളും ഉണ്ടാക്കുന്ന അമിലോയിഡ്, ടൗ എന്നിവ നീക്കം ചെയ്യുന്നതിൽ അൾട്രാസൗണ്ട് തെറാപ്പി ഉപയോ​ഗിക്കാം.