ഹാട്രിക് വിജയത്തിന്റെ ആഘോഷത്തിലാണ് സംവിധായകൻ ജിത്തു മാധവൻ. സംവിധാനം ചെയ്ത മൂന്നു ചിത്രവും ​ഗംഭീര വിജയങ്ങളായതോടെ അടുത്ത സിനിമക്കായുള്ള കാത്തിരിപ്പിലാണ് പ്രേക്ഷകരും.

ഇതിനിടെ അടുത്തതായി സംവിധാനം ചെയ്യാനിരിക്കുന്ന ചിത്രത്തിൽ ദുൽഖർ സൽമാൻ നായകനും മമിത ബൈജു നായികയുമാകുമെന്ന അഭ്യൂഹങ്ങൾ പ്രചരിച്ചിരുന്നു. ഇപ്പോൾ അത്തരം വാർത്തകളിൽ വ്യക്തത വരുത്തുകയാണ് ജിത്തു മാധവൻ.

വാർത്തകൾ വെറും അഭ്യൂഹങ്ങൾ മാത്രമാണെന്നും അടുത്ത സിനിമയെക്കുറിച്ച് ഇതുവരെ തീരുമാനങ്ങളൊന്നും എടുത്തിട്ടില്ലെന്നും ജിത്തു വ്യക്തമാക്കി. സൂര്യ നായകനായ 'സീൻ' സിനിമയുടെ വിജയാഘോഷത്തോടനുബന്ധിച്ച് കൊച്ചിയിൽ നടന്ന വാർത്താസമ്മേളനത്തിലായിരുന്നു പ്രതികരണം. വാർത്തകളുടെ വാസ്തവമെന്താണെന്ന മാധ്യമപ്രവർത്തകരുടെ ചോദ്യത്തിന് 'അതെല്ലാം റൂമറുകളാണ്' എന്നായിരുന്നു സംവിധായകന്റെ മറുപടി.

നിലവിൽ അടുത്ത സിനിമയൊന്നും പ്ലാൻ ചെയ്തിട്ടില്ലെന്നും പുതിയൊരു പ്രോജക്ടിനെക്കുറിച്ച് ചിന്തിക്കാനുള്ള മാനസികാവസ്ഥയിലേക്ക് എത്തിയിട്ടില്ലെന്നും ജിത്തു പറഞ്ഞു. രണ്ടാഴ്ച കൂടി കഴിഞ്ഞശേഷം മാത്രമേ അടുത്തതായി എന്തുചെയ്യണമെന്നതിനെക്കുറിച്ച് ആലോചിക്കുകയുള്ളൂവെന്നും അദ്ദേഹം വ്യക്തമാക്കി.