ദുബൈ : ഇന്‍റർപോൾ റെഡ്​ നോട്ടീസ്​ പുറപ്പെടുവിച്ചിരുന്ന നിരവധി ക്രിമിനൽ കേസുകളിൽ പ്രതികളായ രണ്ട്​ പേരെ യു എ ഇ​ സർക്കാർ ഫ്രാൻസിന്​ കൈമാറി. ഇരുവരും ഫ്രഞ്ച്​ പൗ​രൻമാരാണ്. ഇവർ യൂറോപോളിന്‍റെയും യൂറോപ്യൻ യൂണിയന്റെ ലോ എൻഫോഴ്​സ്​മെന്‍റ്​ ഏജൻസിയുടെയും ക്രിമിനൽ ലിസ്റ്റിൽ ഉൾപ്പെട്ടവരാണ്.​ ദുബൈ പൊലിസും ജനറൽ ഡിപാർട്ട്​മെന്‍റ്​ ഓഫ്​ ക്രിമിനൽ ഇൻവെസ്റ്റിഗേഷനും സംയുക്തമായി നടത്തിയ പരിശോധനയിലാണ് ഇരുവരും പിടിയിലായത്.

യു എ ഇയിലെ നിയമപരമായ നടപടിക്രമങ്ങൾ മുഴുവൻ പാലിച്ചാണ്​ കുറ്റവാളികളെ ഫ്രാൻസിന്​ കൈമാറിയതെന്ന്​​ ദുബൈ പൊലീസ്​ അറിയിച്ചു. ​ ഈ വർഷം ഫ്രഞ്ച്​ സർക്കാറിന് 10 കുറ്റവാളികളെയാണ് യു എ ഇ കൈമാറിയത്. അന്താരാഷ്ട്ര ഏജൻസികളിൽ നിന്ന്​ യു എ ഇയിലെ നീതിന്യായ മന്ത്രാലയത്തിന് ലഭിക്കുന്ന അറസ്റ്റ് വാറന്റുകളുടെ അടിസ്ഥാനത്തിലാണ് ​പ്രതികളെ ദുബൈ പൊലീസ്​ പിടികൂടുന്നത്​​.

കൊലപാതകം,ആയുധ കവർച്ച, കള്ളപ്പണം വെളുപ്പിക്കൽ, ലഹരിമരുന്ന് ​ കടത്ത്​ തുടങ്ങിയ ഗുരുതരമായ കുറ്റകൃത്യങ്ങളിൽ ഉൾപ്പെട്ടവരാണ്​ ഫ്രാൻസിന്​ കൈമാറിയ ​പ്രതികൾ. ലോകരാജ്യങ്ങളിലെ വിവിധ അന്വേഷണ ഏജൻസികളുമായുള്ള സഹകരണം ശക്​തിപ്പെടുത്തുന്നതിന്റെ ഭാഗമായി ആണ് കുറ്റവാളി കൈമാറ്റമെന്ന്​ ദുബൈ പൊലീസ്​ വ്യക്തമാക്കി.