കുവൈത്ത് സിറ്റി: താമസ സ്ഥലം മാറിയിട്ടും രേഖകളിൽ നിന്ന് പഴയ മേൽവിലാസം മാറ്റാത്തവരുടെ പട്ടിക പുറത്ത് വിട്ട് കുവൈത്ത്. 546 പേ​രു​ടെ വിവരങ്ങളാണ് ഗസറ്റിലൂടെ അധികൃതർ പങ്ക് വെച്ചത്. തുടർ നടപടികൾ ഒഴിവാക്കാൻ ഒരു മാസത്തിനുള്ളിൽ ഈ വ്യക്തികളുടെ ഇപ്പോൾ താമസിക്കുന്ന സ്ഥലത്തെ മേൽവിലാസം ഉൾപ്പെടുത്തണമെന്ന് അധികൃതർ വ്യക്തമാക്കി.

ലിസ്റ്റിൽ ഉൾപ്പെട്ടവർക്ക് നേ​രി​ട്ടോ സ​ർ​ക്കാ​ർ ആ​പ്ലി​ക്കേ​ഷ​നാ​യ സ​ഹ​ൽ വ​ഴി​യോ വിവരങ്ങൾ ഉൾപ്പെടുത്താം. പ​ബ്ലി​ക് അ​തോ​റി​റ്റി ഫോ​ർ സി​വി​ൽ ഇ​ൻ​ഫ​ർ​മേ​ഷ​ന്റെ (പാ​സി) ഔ​ദ്യോ​ഗി​ക ഗ​സ​റ്റാ​യ കു​വൈ​ത്ത് അ​ലി​യൂ​മിൽ വഴി വ്യക്തികളുടെ പേര് വിവരങ്ങൾ കാണാൻ കഴിയും. ഒരു മാസത്തിനുള്ളിൽ മേൽവിലാസം മാറ്റിയില്ലെങ്കിൽ ഈ വ്യക്തികൾ പിഴയും തുടർ നടപടികളും നേരിടേണ്ടി വരുമെന്നും അധികൃതർ മുന്നറിയിപ്പ് നൽകി.

ഈ വ്യക്തികൾ താമസിച്ചിരുന്ന കെ​ട്ടി​ട​ങ്ങ​ൾ പൊ​ളി​ച്ചു​മാ​റ്റി​യ​ സാഹചര്യത്തിലും, വീട്ടുടമയുടെ അഭ്യർത്ഥന പ്രകാരവുമാണ് 546 പേരുടെ വിവരങ്ങൾ ഗസറ്റിൽ പ്രസിദ്ധീകരിച്ചത്. പു​തി​യ വി​ലാ​സം അ​പ്‌​ഡേ​റ്റ് ചെ​യ്യാ​ത്തത് 100 ദി​നാ​ർ പി​ഴ ചുമത്താവുന്ന കുറ്റമാണ്.

കുവൈത്തിൽ താമസിച്ചിരുന്ന ഒരു വ്യക്തി മറ്റൊരു രാജ്യത്തേക്ക് താമസം മാറിയാൽ ആ വിവരങ്ങളും നിരബന്ധമായും ബന്ധപ്പെട്ട ഉദ്യോഗസ്ഥരെ അറിയിക്കണമെന്നും അധികൃതർ വ്യക്തമാക്കി.