ന്യൂഡൽഹി: ജീവൻരക്ഷാ കാൻസർ മരുന്നുകൾക്ക് ആശുപത്രികൾ പത്തിരട്ടി വരെ അമിതവില ഈടാക്കുന്നതിനെതിരെ രൂക്ഷമായ ഭാഷയിൽ ആഞ്ഞടിച്ച് സുപ്രീം കോടതി. 'ഇത് നരനായാട്ട്' ആണെന്നും ലളിതമായ ഭാഷയിൽ മറ്റൊരു വിശേഷണവും അർഹിക്കുന്നില്ലെന്നും കോടതി ചൂണ്ടിക്കാട്ടി. ആശുപത്രികളുടെയും വിതരണക്കാരുടെയും ഈ ക്രൂരമായ ചൂഷണം സാധാരണക്കാരായ രോഗികളെ വഴിയാധാരമാക്കുകയാണെന്ന് ചൂണ്ടിക്കാട്ടിയ പരമോന്നത കോടതി, രാജ്യത്ത് വിറ്റഴിക്കുന്ന എല്ലാത്തരം മരുന്നുകൾക്കും പരമാവധി 16 ശതമാനം എന്ന ഏകീകൃത ലാഭപരിധി നിശ്ചയിക്കുന്ന കാര്യം പരിഗണിക്കണമെന്ന് കേന്ദ്ര സർക്കാരിനോട് നിർദ്ദേശിച്ചു. ജസ്റ്റിസ് വിക്രം നാഥ്, ജസ്റ്റിസ് സന്ദീപ് മേത്ത എന്നിവരടങ്ങിയ ബെഞ്ചാണ് കോർപ്പറേറ്റ് ആശുപത്രികളുടെയും ഫാർമസ്യൂട്ടിക്കൽ വിപണിയുടെയും കൊള്ളലാഭത്തിനെതിരെ കർശന നിലപാട് വ്യക്തമാക്കിയത്.

മരുന്ന് മൊത്തവിതരണക്കാർക്ക് വെറും 2,700 രൂപയ്ക്ക് ലഭിക്കുന്ന കാൻസർ മരുന്നുകൾക്ക് ആശുപത്രികൾ എംആർപിയായി 27,000 രൂപ രേഖപ്പെടുത്തി രോഗികളിൽനിന്ന് പിഴിഞ്ഞെടുക്കുകയാണെന്ന ഞെട്ടിക്കുന്ന യാഥാർത്ഥ്യം ജസ്റ്റിസ് സന്ദീപ് മേത്ത എടുത്തുപറഞ്ഞു. "ആശുപത്രികൾ ആരെയും വെറുതെ വിടുന്നില്ല. ബില്ലടച്ചില്ലെങ്കിൽ മൃതദേഹം പോലും വിട്ടുകൊടുക്കാൻ മടിക്കുന്ന അവസ്ഥയാണ് പലയിടത്തും കാണുന്നത്. കോർപ്പറേറ്റ് ആശുപത്രികൾ എന്നത് സേവനമേഖലയല്ലാതായി മാറിയിരിക്കുന്നു; അതൊരു വ്യവസായ കേന്ദ്രം മാത്രമാണ്. എന്തിനാണ് സാധാരണക്കാർ ഇതിന്റെ പേരിൽ ഇത്രയധികം ദുരിതം അനുഭവിക്കുന്നത്? അവശ്യമരുന്നുകൾ, അല്ലാത്തവ എന്ന വേർതിരിവ് ഒഴിവാക്കി അവശ്യസാധന നിയമത്തിന്റെ പരിധിയിൽ വരുന്ന എല്ലാ മരുന്നുകൾക്കും പരമാവധി 16 ശതമാനത്തിൽ കൂടുതൽ ലാഭവിഹിതം അനുവദിക്കരുത്," കോടതി വ്യക്തമാക്കി.

രോഗികൾ തങ്ങളുടെ സ്വന്തം ഫാർമസിയിൽ നിന്ന് തന്നെ ഉയർന്ന വിലയ്ക്ക് മരുന്നുകൾ വാങ്ങണമെന്ന് നിർബന്ധിക്കുകയും പുറത്തുനിന്ന് കുറഞ്ഞ വിലയ്ക്ക് മരുന്ന് വാങ്ങിയാൽ ചികിത്സ ഉറപ്പുനൽകില്ലെന്ന് ആശുപത്രികൾ ഭീഷണിപ്പെടുത്തുകയും ചെയ്യുന്ന വിഷയം കേന്ദ്ര സർക്കാർ അടിയന്തരമായി പരിശോധിക്കണമെന്ന് ബെഞ്ച് ആവശ്യപ്പെട്ടു. സർക്കാരിന്റെ ഇൻഷുറൻസ് പദ്ധതികൾ വഴി ചികിത്സ തേടുന്ന രോഗികളുടെ ഈ അമിത ബില്ലുകൾ അടച്ചുതീർക്കുന്നത് രാജ്യത്തെ സാധാരണക്കാരായ നികുതിദായകരുടെ പണമാണെന്നും, ആ തുക കൊള്ളലാഭമായി പോക്കറ്റിലാക്കുന്നത് സ്വകാര്യ ആശുപത്രികളാണെന്നും കോടതി ചൂണ്ടിക്കാട്ടി. കൃത്യമായ നിയന്ത്രണങ്ങൾ കൊണ്ടുവരേണ്ട അധികാരികൾ ഇതിനുനേരെ കണ്ണടയ്ക്കുന്നത് അത്ഭുതപ്പെടുത്തുന്നുവെന്നും ബെഞ്ച് നിരീക്ഷിച്ചു.

വിഷയത്തിൽ വിപണി സന്തുലിതാവസ്ഥ ഉറപ്പാക്കുന്ന ഒരു ശാശ്വത പരിഹാരം ആവശ്യമാണെന്ന് കേന്ദ്ര സർക്കാരിന് വേണ്ടി ഹാജരായ സോളിസിറ്റർ ജനറൽ തുഷാർ മേത്ത കോടതിയിൽ സമ്മതിച്ചു. അമിത ലാഭം നേടുന്നത് മരുന്ന് കമ്പനികളല്ലെന്നും മറിച്ച് സ്വകാര്യ ആശുപത്രികളാണെന്നാണ് പ്രാഥമികമായി മനസ്സിലാക്കാൻ സാധിക്കുന്നതെന്നും വ്യക്തമാക്കിയ അദ്ദേഹം, ബന്ധപ്പെട്ട മന്ത്രാലയങ്ങളുമായി ചർച്ച നടത്താൻ രണ്ടാഴ്ചത്തെ സമയം അനുവദിക്കണമെന്ന് അഭ്യർത്ഥിച്ചു. ഇത് അംഗീകരിച്ച കോടതി കേസ് ഒക്ടോബർ 12-ന് വീണ്ടും പരിഗണിക്കാനായി മാറ്റി. അവശ്യമരുന്നുകൾ ഉയർന്ന വിലയ്ക്ക് വിൽക്കുന്നത് തടയണമെന്നും ഡോക്ടർമാർ ജനറിക് മരുന്നുകൾ നിർബന്ധമായും കുറിക്കണമെന്നും ആവശ്യപ്പെട്ട് അഡ്വ. കിഷൻ ചന്ദ് ജെയിൻ ഉൾപ്പെടെ സമർപ്പിച്ച പൊതുതാൽപ്പര്യ ഹർജികളിലാണ് സുപ്രീം കോടതിയുടെ ഇടപെടൽ.