കൊച്ചി: വായ്പാ തിരിച്ചടവിനുള്ള അവസാന ദിനം രാവിലെ ബാങ്കില്‍ പണമടയ്ക്കാനെത്തിയിട്ടും, വായ്പ നല്‍കിയ സ്ഥാപനം അതിനുമുമ്പ് ചെക്ക് ഹാജരാക്കിയതിനെത്തുടര്‍ന്ന് ചെക്ക് മടങ്ങിയ സംഭവത്തില്‍ വായ്പക്കാരന് തിരിച്ചടി. വായ്പാ കരാറില്‍ തിരിച്ചടവ് ഒരു നിശ്ചിത തീയതിയിലോ അതിന് മുമ്പോ നടത്തണമെന്നാണ് വ്യവസ്ഥയെങ്കില്‍, ആ തീയതിയില്‍ തന്നെ വായ്പ നല്‍കിയ സ്ഥാപനത്തിന് ചെക്ക് ഹാജരാക്കാമെന്ന് സംസ്ഥാന ഉപഭോക്തൃ തര്‍ക്ക പരിഹാര കമ്മീഷന്‍ വ്യക്തമാക്കി. ഇതോടെ ഒമ്പത് വര്‍ഷത്തോളം നീണ്ട നിയമപോരാട്ടത്തില്‍ വയനാട് സ്വദേശിയായ ജോസഫ് പിജെക്ക് അനുകൂലമായിരുന്ന ജില്ലാ ഉപഭോക്തൃ കമ്മീഷന്റെ ഉത്തരവ് റദ്ദായി.

2017 മാര്‍ച്ച് 15നായിരുന്നു കേസിനാസ്പദമായ സംഭവം. അന്ന് ബാങ്കിലെ ക്യാഷ് കൗണ്ടറില്‍ ഇടപാട് നടത്തിയ ആദ്യ വ്യക്തി താനായിരുന്നുവെന്നാണ് ജോസഫ് പറയുന്നത്. വായ്പയുടെ പ്രതിമാസ തിരിച്ചടവ് തീയതിയായതിനാല്‍ പിഴ ഒഴിവാക്കാന്‍ അന്നുതന്നെ പണം അടയ്ക്കാന്‍ തീരുമാനിക്കുകയായിരുന്നു. എന്നാല്‍ രാവിലെ 10.30ന് ബാങ്കില്‍ പണം നിക്ഷേപിക്കുന്നതിന് മുമ്പുതന്നെ വായ്പ നല്‍കിയ സ്ഥാപനം ചെക്ക് ബാങ്കില്‍ ഹാജരാക്കിയിരുന്നു. അക്കൗണ്ടില്‍ ആവശ്യമായ തുക ഇല്ലാതിരുന്നതിനാല്‍ ചെക്ക് മടങ്ങി. തുടര്‍ന്ന് സ്ഥാപനം ജോസഫിനോട് പിഴയും ചെക്ക് മടങ്ങിയതിനുള്ള ചാര്‍ജും അടയ്ക്കാന്‍ ആവശ്യപ്പെട്ടു. ഈ തുക അടുത്ത മാസത്തെ തിരിച്ചടവിനൊപ്പം നല്‍കണമെന്നായിരുന്നു നിര്‍ദേശം. ജോസഫിന് 53 രൂപ പിഴപ്പലിശയായി സ്ഥാപനം ഈടാക്കി.

സ്വകാര്യ സ്ഥാപനത്തില്‍നിന്ന് 2.49 ലക്ഷം രൂപയായിരുന്നു ജോസഫ് വായ്പയെടുത്തത്. എല്ലാ മാസവും 15-ാം തീയതിക്കോ അതിന് മുമ്പോ തിരിച്ചടവ് നടത്തണമെന്നായിരുന്നു കരാറിലെ വ്യവസ്ഥ. പിഴയടയ്ക്കാന്‍ ആവശ്യപ്പെട്ടുകൊണ്ടുള്ള നോട്ടീസ് ലഭിച്ചതില്‍ പ്രതിഷേധിച്ച ജോസഫ്, വയനാട് ജില്ലാ ഉപഭോക്തൃ തര്‍ക്ക പരിഹാര കമ്മീഷനെ സമീപിച്ചു. അഭിഭാഷകന്റെ സഹായമില്ലാതെ സ്വയം വാദിച്ചാണ് അദ്ദേഹം കേസ് നടത്തിയത്. 2017 ഡിസംബറില്‍ ജില്ലാ കമ്മീഷന്‍ ജോസഫിന് അനുകൂലമായി വിധിച്ചു. വായ്പ നല്‍കിയ സ്ഥാപനത്തിന്റെ ഭാഗത്തുനിന്ന് വീഴ്ചയുണ്ടായതായി കണ്ടെത്തിയ കമ്മീഷന്‍, 1,500 രൂപ നഷ്ടപരിഹാരവും 1,000 രൂപ കോടതി ചെലവും ജോസഫിന് നല്‍കാന്‍ ഉത്തരവിട്ടു. എന്നാല്‍ ഈ ഉത്തരവിനെതിരെ സ്ഥാപനം 2018ല്‍ സംസ്ഥാന കമ്മീഷനില്‍ അപ്പീല്‍ നല്‍കി.

സംസ്ഥാന കമ്മീഷനില്‍നിന്ന് നോട്ടീസ് ലഭിച്ചതിനെത്തുടര്‍ന്ന് കേസ് വയനാട്ടിലെ ഒരു അഭിഭാഷകനെ ഏല്‍പ്പിച്ചിരുന്നുവെന്നാണ് ജോസഫ് ന്യൂ ഇന്ത്യന്‍ എക്‌സ്പ്രസിനോട് പറഞ്ഞത്. എന്നാല്‍ പിന്നീട് കേസിന്റെ പുരോഗതിയെക്കുറിച്ച് വിവരങ്ങളൊന്നും ലഭിച്ചില്ലെന്നും അദ്ദേഹം വ്യക്തമാക്കി. സംസ്ഥാന കമ്മീഷന്റെ ഉത്തരവില്‍, വാദം കേള്‍ക്കുന്ന സമയത്ത് ജോസഫിന്റെ ഭാഗത്തുനിന്ന് ആരും ഹാജരായില്ലെന്ന് രേഖപ്പെടുത്തിയിട്ടുണ്ട്.

ഈ മാസം 8ന് അപ്പീല്‍ അനുവദിച്ച സംസ്ഥാന കമ്മീഷന്‍, വായ്പാ കരാറിലെ വ്യവസ്ഥകള്‍ പ്രകാരം സ്ഥാപനത്തിന് തിരിച്ചടവ് തീയതിയായ 15-ാം തീയതി തന്നെ ചെക്ക് ഹാജരാക്കാന്‍ അവകാശമുണ്ടെന്ന് വ്യക്തമാക്കി. അക്കൗണ്ടില്‍ ആവശ്യത്തിന് പണമില്ലാത്തതിനാലാണ് ചെക്ക് മടങ്ങിയത്. ഇതില്‍ വായ്പ നല്‍കിയ സ്ഥാപനത്തിന് ഉത്തരവാദിത്തമില്ലെന്നും കമ്മീഷന്‍ നിരീക്ഷിച്ചു. ചെക്ക് ഹാജരാക്കിയ സമയത്ത് അക്കൗണ്ടില്‍ ആവശ്യമായ പണം ഉണ്ടായിരുന്നുവെന്ന് ജോസഫ് അവകാശപ്പെട്ടിട്ടില്ലെന്നും ഉത്തരവില്‍ ചൂണ്ടിക്കാട്ടി. കരാറില്‍ വ്യവസ്ഥ ചെയ്തതനുസരിച്ചാണ് പിഴപ്പലിശ ഈടാക്കിയതെന്നും കമ്മീഷന്‍ വ്യക്തമാക്കി.

സംസ്ഥാന കമ്മീഷന്റെ ഉത്തരവ് വായ്പയെടുക്കുന്നവര്‍ക്ക് പാഠമാണെന്ന് റിപ്പോര്‍ട്ട് ചൂണ്ടിക്കാട്ടുന്നു. തിരിച്ചടവിന്റെ അവസാന തീയതിയില്‍ പണം അടയ്ക്കാനാണ് ഉദ്ദേശിക്കുന്നതെങ്കില്‍, ബാങ്കില്‍ പണം നിക്ഷേപിക്കുന്നതിനു മുമ്പ് തന്നെ വായ്പ നല്‍കിയ സ്ഥാപനം ചെക്ക് ഹാജരാക്കാന്‍ സാധ്യതയുണ്ടെന്ന കാര്യം ശ്രദ്ധിക്കണം. വായ്പയുടെ തിരിച്ചടവിനായി നല്‍കിയ ചെക്ക് മടങ്ങിയാല്‍, കരാറിലെ വ്യവസ്ഥകള്‍ക്കനുസരിച്ച് പിഴയോ മറ്റ് ചാര്‍ജുകളോ നല്‍കേണ്ട സാഹചര്യമുണ്ടാകാം. അതിനാല്‍ അവസാന തീയതിക്കായി കാത്തിരിക്കുന്നതിനുപകരം, അക്കൗണ്ടില്‍ ആവശ്യമായ തുക നേരത്തേ ഉറപ്പാക്കുന്നത് ഇത്തരം പ്രശ്‌നങ്ങള്‍ ഒഴിവാക്കാന്‍ സഹായിക്കും.