ന്യൂഡല്ഹി: സൗന്ദര്യവും അഭിനയമികവുകൊണ്ടും ഇന്ത്യയുടെ മനംകവര്ന്ന ഇതിഹാസതാരം ശ്രീദേവിയുടെ മരണം അക്ഷരംപ്രതി സിനിമാലോകത്തെ ഞെട്ടിച്ചു. ഇന്ത്യന് സിനിമാലോകത്തെ ആദ്യലേഡി സൂപ്പര് സ്റ്റാര് ഇനിയില്ലെന്ന യാഥാര്ത്ഥ്യത്തോട് പൊരുത്തപ്പെടാന് സിനിമാലോകത്തിന് കഴിഞ്ഞിട്ടില്ല. നാനാതുറകളില് നിന്നും അനുശോചനപ്രവാഹം ഒഴുകിയെത്തുകയാണ്.
ഇന്ത്യന് സിനിമയിലെ ആദ്യ ലേഡീ സൂപ്പര്സ്റ്റാര് എന്നറിയപ്പെടുന്ന ശ്രീദേവിയുടെ അന്ത്യം ഹൃദയാഘാതത്തെത്തുടര്ന്ന് ശനി രാത്രി 11.30 ന് ദുബായില്വച്ചായിരുന്നു . ഭര്ത്താവ് ബോണി കപൂറും മകള് ഖുഷിയും മരണസമയത്ത് സമീപത്തുണ്ടായിരുന്നുവെന്നാണ് റിപ്പോര്ട്ടുകള്.
ബോളിവുഡ് നടന് മോഹിത് മര്വയുടെ വിവാഹത്തില് പങ്കെടുക്കാനായാണ് ശ്രീദേവിയും കുടുംബവും ദുബായിലെത്തിയത്. ബോണി കപൂറിന്റെ സഹോദരന് സഞ്ജയ് കപൂര് മരണവിവരം സ്ഥിരീകരിച്ചു.
ഹിന്ദി, മലയാളം, തമിഴ്, തെലുഗ്, കന്നഡ ഭാഷകളിലായി നുറോളം സിനിമകളില് അഭിനയിച്ചിട്ടുണ്ട്. നാലാം വയസില് തുണൈവന് എന്ന ചിത്രത്തില് ബാലതാരമായി അഭിനയ രംഗത്തേക്ക് വന്ന ശ്രീദേവി ദേവരാഗം, കുമാര സംഭവം ഉള്പ്പെടെയുള്ള 26 മലയാള സിനിമകളില് അഭിനയിച്ചിട്ടുണ്ട്. 1971 പൂമ്പാറ്റ എന്ന ചിത്രത്തിലെ അഭിനയത്തിന് മികച്ച ബാലതാരത്തിനുള്ള സംസ്ഥാന അവാര്ഡ് ലഭിച്ചിരുന്നു.
1963 ഓഗസ്റ്റ് 13 ന് തമിഴ്നാട്ടിലെ ശിവകാശിയിലാണ് ശ്രീദേവി ജനിച്ചത്. അച്ഛന് അയ്യപ്പന് അഭിഭാഷകനായിരുന്നു. അമ്മ രാജേശ്വരി. 1976 ല് പതിമൂന്നാം വയസ്സില്, കെ.ബാലചന്ദര് സംവിധാനം ചെയ്ത 'മുണ്ട്ര് മുടിച്ച്' എന്ന ചിത്രത്തില് കമല്ഹാസനും രജനീകാന്തിനുമൊപ്പം നായികയായി അരങ്ങേറി. തമിഴ്, തെലുങ്ക്, മലയാളം, കന്നട, ഹിന്ദി ഭാഷകളിലായി മുന്നൂറോളം ചിത്രങ്ങളിലഭിനയിച്ച ശ്രീദേവി ബോളിവുഡിലെ ആദ്യ വനിതാ സൂപ്പര്സ്റ്റാര് എന്നാണ് അറിയപ്പട്ടത്. 2013 ല് പദ്മശ്രീ നല്കി രാജ്യം ആദരിച്ചു. 1981 ല് മൂന്നാംപിറയിെല അഭിനയത്തിന് മികച്ച നടിക്കുള്ള തമിഴ്നാട് സര്ക്കാരിന്റെ പുരസ്കാരം ലഭിച്ചു. രണ്ട് സംസ്ഥാന ചലചിത്ര പുരസ്കാരങ്ങളും ആറ് ഫിലിം ഫെയര് പുരസ്കാരങ്ങളും ശ്രീദേവിക്ക് ലഭിച്ചിട്ടുണ്ട്.
1983 ലെ ഹിമ്മത് വാല ആണ് ആദ്യത്തെ ബോളിവുഡ് ചിത്രം. 1990 കളില് ബോളിവുഡില് ഏറ്റവുമധികം പ്രതിഫലം വാങ്ങുന്ന നടിയായി ശ്രീദേവി മാറി. 1997 ല് അഭിനയ രംഗത്ത് നിന്ന് താത്കാലികമായി വിടപറഞ്ഞ ശ്രീദേവി 2012 ല് ഇംഗ്ലീഷ് വിംഗ്ലിഷ് എന്ന സിനിമയിലൂടെയാണ് അഭിനയ രംഗത്തേക്ക് തിരികെ എത്തിയത്. തുടര്ന്ന് 2013 ല് രാജ്യം പദ്മശ്രീ പുരസ്കാരം നല്കി ആദരിച്ചിരുന്നു. 2017 ല് പുറത്തിറങ്ങിയ മാം (MOM) ആണ് അവസാനമായി പുറത്തിറങ്ങിയ ചിത്രം. ഈ വര്ഷം ഡിസംബറില് റിലീസ് ചെയ്യാന് ഉദ്ദേശിച്ചിരുന്ന സീറോ എന്ന ഹിന്ദി ചിത്രത്തിലാണ് അവസാനമായി അഭിനയിച്ചത്. മകള് ജാഹ്നവിയുടെ ബോളിവുഡ് പ്രവേശനം സംബന്ധിച്ച ചര്ച്ചകള് നടന്നുകൊണ്ടിരിക്കെയാണ് ശ്രീദേവിയുടെ മരണം.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ