നവാഗതനായ മധു സി നാരായണന്‍ സംവിധാനം ചെയ്യുന്ന കുമ്പളങ്ങി നൈറ്റ്‌സിൽ വ്യത്യസ്ത ഭാവത്തിൽ പ്രേക്ഷകരെ ഞെട്ടിക്കാൻ ഒരുങ്ങുകയാണ് ഫഹദ് ഫാസിൽ. മുഴുനീള സൈക്കോ വില്ലനായാണ് ഫഹദ് ചിത്രത്തിൽ വേഷമിടുന്നതെന്നാണ് റിപ്പോർട്ടുകൾ.
നായകനായ ആദ്യചിത്രം കിസ്മത്തിലൂടെതന്നെ പ്രേക്ഷകരുടെ ഹൃദയം കീഴടക്കിയ ഷെയന്‍ നിഗമാണ് ചിത്രത്തില്‍ നായകനായി എത്തുന്നത്. അടുത്ത വര്‍ഷം ഫെബ്രുവരി ഏഴിനാണ് റിലീസ്. ദിലീഷ് പോത്തന്‍, നസ്രിയ, ശ്യാം പുഷ്‌ക്കരന്‍ എന്നിവരാണ് ചിത്രം നിര്‍മിക്കുന്നത്. സിനിമയുടെ കഥ കേട്ടപ്പോള്‍ റോള്‍ ഫഹദ് സ്വയം ആവശ്യപ്പെടുകയായിരുന്നെന്ന് ശ്യാം പുഷ്‌കരന്‍ മുമ്പ് നല്‍കിയ അഭിമുഖങ്ങളില്‍ പറഞ്ഞിട്ടുണ്ട്.
മുമ്പും പല ചിത്രങ്ങളിൽ നെഗറ്റീവ് വേഷപ്പകർച്ചകൾ ഫഹദ് കൈകാര്യം ചെയ്തിട്ടുണ്ടെങ്കിലും ആദ്യമായാണ് ഒരു സൈക്കോ കഥാപാത്രത്തെ ഫഹദ് അവതരിപ്പിക്കുന്നത്. സൗബിന്‍ ഷാഹിര്‍, ശ്രീനാഥ് ഭാസി, മാത്യു.ടി തോമസ് തുടങ്ങിയവരും ചിത്രത്തിൽ ശ്രദ്ധേയമായ വേഷങ്ങൾ കൈകാര്യം ചെയ്യുന്നുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
