ന്യൂഡല്‍ഹി: രാഷ്ട്രീയ പ്രവേശന വാര്‍ത്തകള്‍ നിഷേധിച്ച് ബോളിവുിഡ് നടി കരീന കപൂര്‍. രാഷ്ട്രീയ പ്രവേശന വാര്‍ത്തകളില്‍ സത്യമില്ലെന്നും ആരും തന്നെ സമീപിച്ചിട്ടില്ലെന്നും ശ്രദ്ധ സിനിമയില്‍ മാത്രമാണെന്നും കരീന വ്യക്തമാക്കി. മധ്യപ്രദേശില്‍ നിന്ന് കരീനയെ കോണ്ഗ്രസ് മത്സരിപ്പിക്കാന്‍ നീക്കം നടത്തുന്നു എന്നായിരുന്നു വാര്‍ത്തകള്‍. ഭോപ്പാല്‍ ലോക്‌സഭ മണ്ഡലത്തില്‍ നടിയെ ഇറക്കാനാണ് കോണ്ഗ്രസ് നീക്കം എന്നായിരുന്നു പ്രചാരണം.
ഭോപ്പാല്‍ ലോക്‌സഭാ മണ്ഡലം എക്കാലത്തും ബിജെപിയുടെ ഉരുക്ക് കോട്ടയാണ്. കരീനയെ പോലെ ഉയര്‍ന്ന താരപരിവേഷം ഉള്ള ഒരാളെ സ്ഥാനാര്‍ത്ഥിയാക്കുന്നതിലൂടെ മണ്ഡലം തിരിച്ചുപിടിക്കാനാവുമെന്ന് കോണ്ഗ്രസ് പ്രതീക്ഷിക്കുന്നു. കോണ്ഗ്രസ് നേതാക്കളായ ഗുദ്ദു ചൗഹാനും അനീസ് ഖാനുമാണ് ഈ നീക്കത്തിന് പിന്നില്‍- റിപ്പോര്‍ട്ട് പറയുന്നു.
പ്രശസ്ത ക്രിക്കറ്റ് താരം മന്‍സൂര്‍ അലിഖാന്‍ പട്ടൗഡിയുടെ മരുമകളാണ് കരീന. നടന്‍ സെയ്ഫ് അലിഖാന്റെ ഭാര്യയുമാണ്. കൂടാതെ കരീനയുടെ മുത്തച്ഛന്‍ ഭോപ്പാലിലെ അവസാനത്തെ നവാബുമായിരുന്നു. ഇവര്‍ക്ക് ഭോപ്പാല്‍ നഗരത്തില്‍ ഉള്ള സ്വാധീനം പാര്‍ട്ടിക്ക് വിജയം നേടാനാവുമെന്ന കണക്ക് കൂട്ടലാണ് കരീനയെ സ്ഥാനാര്‍ത്ഥിയാക്കാനുള്ള കോണ്ഗ്രസ് നീക്കം. ഇത് സംബന്ധിച്ച് പാര്‍ട്ടിയുടെ യുവനേതാക്കളായ ചൗഹാനും അനീസ് ഖാനും മുഖ്യമന്ത്രിയുമായ ചര്‍ച്ചനടത്തുമെന്നാണ് റിപ്പോര്‍ട്ടുകള്‍.
1991ല്‍ മന്‍സൂര്‍ അലി ഖാന്‍ പട്ടൗഡി ഭോപ്പാലില്‍ കോണ്ഗ്രസ് സ്ഥാനാര്‍ത്ഥിയായി മത്സരിച്ചിരുന്നെങ്കിലും ബിജെപി സ്ഥാനാര്‍ത്ഥി സൂശില്‍ ചന്ദ്രയോട് പരാജയപ്പെട്ടിരുന്നു. ഒരു ലക്ഷത്തിലധികം വോട്ടിനാണ് പട്ടൗഡി അന്ന് പരാജയപ്പെട്ടത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
