ലോകകപ്പ് ഫൈനല്‍ മത്സരം കാണാന്‍ ഇന്ദ്രജിത്ത് കുടുംബസമേതമാണ് ലോര്‍ഡ്‌സിലെത്തിയത് ആരാധകര്‍ക്കിടയില്‍ വാര്‍ത്തയായിരുന്നു. 'ഇന്ത്യ എന്ന വന്‍ മരം വീണു, ഇനിയാര്?' എന്നെല്ലാമായിരുന്നു ഇന്ദ്രജിത്തിന് ആരാധകരില്‍ നിന്ന് ലഭിച്ച കമന്റുകള്‍.
പക്ഷേ ഇന്ത്യയുടെ കളി കാണാന്‍ ടിക്കറ്റ് ബുക്ക് ചെയ്ത താരത്തിന് അത് കാണാനുള്ള അവസരം ലഭിച്ചില്ല. എന്നാല്‍ അതിനേക്കാള്‍ ആവേശം നല്‍കുന്ന മത്സരത്തിനാണ് സാക്ഷിയാകാന്‍ അവസരം ലഭിച്ചതെന്നാണ് താരം പറയുന്നത്. ഫൈനല്‍ മത്സരത്തിനിടെ മൊബൈലില്‍ റെക്കോര്‍ഡ് ചെയ്ത വിഡിയോയും താരം ആരാധകര്‍ക്കായി പങ്കുവച്ചിട്ടുണ്ട്.
'ഇന്ത്യ ഫൈനലില്‍ കളിക്കുമെന്ന പ്രതീക്ഷയിലാണ് ടിക്കറ്റ് ഒപ്പിച്ചത്. ഇന്ത്യ സെമിയില്‍ പുറത്തായപ്പോള്‍ തകര്‍ന്നു പോയി. മികച്ച ഗെയിമുകള്‍ നമ്മെ നിഷ്പക്ഷരാക്കും എന്നു പറയുന്നതു പോലെയായിരുന്നു കാര്യങ്ങള്‍. ഒരു കടുത്ത ക്രിക്കറ്റ് ആരാധകനെ മോഹിപ്പിക്കുന്ന അസാധ്യ മത്സരത്തിനാണ് ഇന്നലെ ഞാന്‍ സാക്ഷിയായത്. എന്തൊരു ഗംഭീര അനുഭവമായിരുന്നു അത്. ഈ കാഴ്ച ഒരിക്കലും മറക്കാന്‍ കഴിയില്ല,' ലോകകപ്പ് ഫൈനലിനു ശേഷം ഇന്ദ്രജിത്ത് ഫേ്‌സ്ബുക്കില്‍ കുറിച്ചു.
കളി ജയിച്ചത് ഇംഗ്ലണ്ട് ആണെങ്കിലും ഗ്യാലറിയിലെ ക്രിക്കറ്റ് ആരാധകരുടെ മനം കവര്‍ന്നത് ന്യൂസിലന്‍ഡ് ആയിരുന്നെന്നും ഇന്ദ്രജിത്ത് പറയുന്നു. 2023ലെ ലോകകപ്പ് നേടാന്‍ ഇന്ത്യയുടെ നീലപ്പടക്ക് സാധിക്കട്ടെയെന്ന ആശംസകളോടെയാണ് ഇന്ദ്രജിത്ത് തന്റെ കുറിപ്പ് അവസാനിപ്പിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
