ജയറാം പ്രധാന വേഷത്തില് എത്തിയ മാര്ക്കോണി മത്തായിയുടെ പ്രധാന ആകര്ഷണം മക്കള് സെല്വന് വിജയ് സേതുപതിയായിരുന്നു. തീയെറ്ററിനെ ആവേശം കൊള്ളിച്ച ചിത്രത്തിലെ എന്നാ പറയാനാ എന്ന ഗാനത്തിന്റെ റീമിക്സ് വിഡിയോ പുറത്തുവന്നിരിക്കുകയാണ്. വിജയ് സേതുപതിയുടേയും ജയറാമിന്റെയും ഡാന്സിനൊപ്പമാണ് പാട്ട്. ചിത്രത്തിന്റെ ലൊക്കേഷന് രംഗങ്ങളും ഒന്നര മിനിറ്റുള്ള വിഡിയോയില് കാണിക്കുന്നുണ്ട്.
അനില് പനച്ചൂരാന്റെ വരികള്ക്ക് എം. ജയചന്ദ്രനാണു സംഗീതം. അജയ് വേണഗോപാല്, ഭാനുപ്രകാശ്, സംഗീത സജിത്ത്, നിഖില് രാജ് എന്നിവരാണു ഗാനം ആലപിച്ചിരിക്കുന്നത്. ജയറാമിന്റെ വിവാഹ ആഘോഷത്തിന്റെ പശ്ചാത്തലത്തിലാണ് ഗാനം എത്തുന്നത്. മുണ്ടും മടക്കിക്കുത്തിയുള്ള വിജയ് സേതുപതിയുടെ ഡാന്സിനും മികച്ച പ്രതികരണമാണ് ലഭിക്കുന്നത്. മക്കള് സെല്വന്റെ ആരാധകരെ ആവേശത്തിലാക്കുന്നതാണ് ഗാനം.
ജോസഫിലൂടെ ആരാധക ശ്രദ്ധ നേടിയ ആത്മിയയാണ് ചിത്രത്തില് നായികയായി എത്തുന്നത്. ജോയ് മാത്യൂ, നരേന്, മല്ലിക സുകുമാരന്, ലക്ഷ്മിപ്രിയ, ദേവി സജിത്ത് എന്നിവരും ചിത്രത്തില് വേഷമിടുന്നു. സനല് കളത്തിലാണു ചിത്രത്തിന്റെ സംവിധാനം. സാജന് കളത്തില് ഛായാഗ്രഹണം നിര്വഹിച്ചിരിക്കുന്ന ചിത്രത്തിന്റെ തിരക്കഥ രജീഷ് മിഥിലയുടെതാണ്. വിജയ് സേതുപതിയുടെ ആദ്യ മലയാളം ചിത്രമാണ് മാര്ക്കോണി മത്തായി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ