മോഹന്‍ലാലിനെ നായകനാക്കി പ്രിയദര്‍ശന്‍ സംവിധാനം ചെയ്യുന്ന മരക്കാര്‍ അറബിക്കടലിന്റെ സിംഹത്തിൽ സംവിധായകൻ ഫാസിലും ഒരു പ്രധാനവേഷം കൈകാര്യം ചെയ്യുന്നുണ്ടെന്ന് റിപ്പോർട്ടുകൾ പുറത്തുവന്നപ്പോൾ മുതൽ ആകാംഷയിലാണ് സിനിമാ പ്രേമികൾ. ഇപ്പോഴിതാ ആകാംഷകൾക്ക് വിരാമമിട്ട് ചിത്രത്തിലെ ഫാസിലിന്റെ ഫസ്റ്റ് ലുക്ക് പുറത്തുവിട്ടിരിക്കുകയാണ് അണിയറപ്രവർത്തകർ.
നീണ്ട താടിയും തലയിൽ തൊപ്പിയുമായി ഞെട്ടിക്കുന്ന മേക്കോവറിലാണ് ഫാസിൽ ചിത്രത്തിലെത്തുന്നത്. ഫസ്റ്റ് ലുക്ക് ഇതിനോടകം സമൂഹമാധ്യമങ്ങളിൽ വൈറലായിക്കഴിഞ്ഞു. കുട്ട്യാലി മരയ്ക്കാര്‍ എന്നാണ് ഫാസിലിന്റെ കഥാപാത്രത്തിന്റെ പേര്.
എട്ട് വർഷത്തോളമായി സിനിമ സംവിധാനത്തിൽ നിന്ന് വിട്ടുനിൽക്കുന്ന ഫാസിൽ വീണ്ടും സജീവമാകുമെന്നുള്ള പ്രതീക്ഷയിലാണ് ആരാധകർ. നടൻ പൃഥ്വിരാജ് ഒരുക്കുന്ന മറ്റൊരു മോഹൻലാൽ ചിത്രമായ ലൂസിഫറിലും ഫാസിൽ ഒരു പ്രധാന വേഷം കൈകാര്യം ചെയ്തിട്ടുണ്ട്.
മരക്കാര്‍ അറബിക്കടലിന്റെ സിംഹത്തിലെ പ്രണവ് മോഹൻലാലും കല്യാണി പ്രിയദർശനും ഒന്നിച്ചുള്ള ഒരു നൃത്തരംഗത്തിന്റെ ഫോട്ടോയും കഴിഞ്ഞ ദിവസം പുറത്തുവന്നിരുന്നു. ഇതിന് പിന്നാലെയാണ് ഇപ്പോൾ ഫാസിലിന്റെ ലുക്കും പുറത്തുവിട്ടിട്ടുള്ളത്. ഷൂട്ടിങ് പുരോഗമിക്കുന്ന ചിത്രത്തില്‍ വലിയ താരനിരയാണ് അണിനിരക്കുന്നത്. കീര്‍ത്തി സുരേഷ്, അര്‍ജുന്‍, പ്രഭു, സുനില്‍ ഷെട്ടി എന്നിവരും ചിത്രത്തില്‍ പ്രധാന വേഷങ്ങളില്‍ എത്തുന്നുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
