സൗബിനെ നായകനാക്കി അമല് നീരദ് സിനിമ ഒരുക്കുന്നു. അടുത്ത വര്ഷത്തോടെ ചിത്രീകരണം ആരംഭിക്കും. സൗബിൻ തന്നെ വ്യക്തമാക്കിയതാണ് ഇക്കാര്യം. ദ ക്യുവിന് നൽകിയ അഭിമുഖത്തിലാണ് സൗബിൻ ഇക്കാര്യം വ്യക്തമാക്കിയത്.
മമ്മൂട്ടിയെ നായകനാക്കി അമൽ നീരദ് ഒരുക്കുന്ന ബിലാൽ എന്ന ചിത്രം പൂര്ത്തിയാക്കിയ ശേഷം സൗബിൻ നായകനാകുന്ന ചിത്രം തുടങ്ങാനാണ് പദ്ധതി. അമല് നീരദിൻ്റെ സംവിധാന സഹായിയും സഹ സംവിധായകനുമായി പ്രവര്ത്തിച്ചിട്ടുള്ള വ്യക്തിയാണ് സൗബിൻ. അന്വര് എന്ന ചിത്രത്തിൻ്റെ ലൊക്കേഷനില് സഹ സംവിധായകനായി പ്രവര്ത്തിക്കുന്ന സൗബിൻ്റെ ചിത്രം സോഷ്യൽ മീഡിയ ഏറ്റെടുത്തിരുന്നു.
അടുത്ത വര്ഷത്തേയ്ക്കായി സൗബിന് ഒരുപിടി ചിത്രങ്ങളാണ് ഉള്ളത്. സൗബിൻ നായകനായ ആന്ഡ്രോയ്ഡ് കുഞ്ഞപ്പന്, വികൃതി എന്നീ ചിത്രങ്ങൾ തീയേറ്ററുകളിൽ വിജയകരമായി പ്രദര്ശനം തുടരുകയാണ്. ഡിസൂസ എന്ന ചിത്രത്തിലാണ് സൗബിന് ഇപ്പോൾ അഭിനയിക്കുന്നത്. ഇത് കൂടാതെ ഭദ്രന് സംവിധാനം ചെയ്യുന്ന ജൂതന് എന്ന ചിത്രവും 2020ല് സൗബിൻ്റേതായി അണിയറയിൽ പുരോഗമിക്കുകയാണ്.
അതിനിടെ മമ്മൂട്ടിയെ നായകനാക്കി അമൽ നീരദ് ഒരുക്കുന്ന ബിലാലിനായി കാത്തിരിക്കുകയാണ് ആരാധകർ. ബിഗ് ബിക്ക് ശേഷം അമൽ നീരദ്- മമ്മൂട്ടി കൂട്ടുകെട്ടിൽ ഏറെ പ്രതീക്ഷയോടെ ആരാധകർ കാത്തിരിക്കുന്ന ചിത്രം കൂടിയാണ് ബിലാൽ.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ