ഹോളിവുഡിലേക്ക് ചേക്കേറിയതിന് ശേഷം നടി പ്രിയങ്ക ചോപ്ര അഭിനയിക്കുന്ന ബോളിവുഡ് ചിത്രമാണ് 'ദ സ്‌കൈ ഈ പിങ്ക്'. ചിത്രത്തിന്റെ ട്രെയിലര്‍ പുറത്തിറങ്ങിയത് മുതല്‍ ആരാധകര്‍ ആകാംക്ഷയോടുകൂടി കാത്തിരിക്കുകയാണ്. ഇപ്പോള്‍ ചിത്രത്തിലെ ആദ്യ ഗാനം കൂടി പുറത്തിറക്കിയിരിക്കുകയാണ് അണിയറപ്രവര്‍ത്തകര്‍.
പ്രിയങ്ക ചോപ്രയും ഫര്‍ഹാന്‍ അക്തറും ഒന്നിച്ചെത്തുന്ന ഈ പ്രണയഗാനവും പുറത്തിറങ്ങിയപ്പോള്‍ മുതല്‍ തന്നെ യൂട്യൂബില്‍ തരംഗമാവുകയാണ്. നിഖില്‍ പോള്‍ ജോര്‍ജ് ആണ് ഈ പാട്ടിന് വരികള്‍ എഴുതിയിരിക്കുന്നത്. ഹെല്‍മെറ്റ് ധരിച്ച് പിറകിലിരിക്കുന്ന പ്രിയങ്കയെയും കൊണ്ട് ഏതോ തെരുവിലൂടെ ബൈക്ക് ഓടിച്ച് വരുന്ന ഫര്‍ഹാനെ ആണ് പാട്ടിന്റെ തുടക്കത്തില്‍ കാണാന്‍ കഴിയുന്നത്.
ചിത്രത്തില്‍ പ്രിയങ്കയുടെയും ഫര്‍ഹാന്റെയും മകളായി സൈറ വാസിം അഭിനയിക്കുന്നു എന്ന പ്രത്യേകയുമുണ്ട്. അഭിനയം നിര്‍ത്തുന്നു എന്ന് പ്രഖ്യാപിക്കുന്നതിന് മുന്‍പ് സൈറ അഭിനയിച്ച ചിത്രമാണിത്. ഒക്ടോബര്‍ 11ന് സിനിമ തിയേറ്ററുകളിലെത്തും.
റിലീസ് ചെയ്യുന്നതിന് മുന്‍പ് തന്നെ 'ദ സ്‌കൈ ഈ പിങ്ക്' രാജ്യാന്തര ചലച്ചിത്രമേളകളില്‍ ശ്രദ്ധിക്കപ്പെട്ടിരുന്നു. ഈ വര്‍ഷം ഏഷ്യയില്‍ നിന്ന് ടൊറന്റോ ഫിലിം ഫെസ്റ്റിവലിലേക്ക് തിരഞ്ഞടുക്കപ്പെട്ട ഏക ചിത്രവും ഇതാണ്. ഒരു യഥാര്‍ത്ഥ കഥയെ ആസ്പദമാക്കിയാണ് ചിത്രം നിര്‍മിച്ചിരിക്കുന്നത്.
ഇക്കഴിഞ്ഞ ജൂണ്‍ 30 ന് സൈറ അഭിനയം നിര്‍ത്തുകയാണ് എന്ന് പറഞ്ഞ് രംഗത്തെത്തിയത് ധാരാളം ചര്‍ച്ചകള്‍ക്ക് വഴിവെച്ചിരുന്നു. താന്‍ സിനിമാഭിനയം നിര്‍ത്തുകയാണെന്ന് സൈറ തന്റെ ഇന്‍സ്റ്റഗ്രാം അക്കൗണ്ടിലൂടെയാണ് ആരാധകരോട് പറഞ്ഞത്. അഭിനയം തന്നെ വിശ്വാസത്തില്‍ നിന്നും അകറ്റുന്നു എന്നാണ് സൈറ ഇതിന് കാരണമായി പറഞ്ഞത്. ദംഗല്‍, സീക്രട്ട് സൂപ്പര്‍ സ്റ്റാര്‍ എന്നീ ബോളിവുഡ് ചിത്രങ്ങളിലൂടെയാണ് സൈറ പ്രശസ്തയായത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
