പുത്തൻ വീടിന്റെ വില തുറന്നുപറഞ്ഞ് ബോളിവുഡ് ഗായകൻ ആദിത്യ നാരായൺ. മാധ്യമങ്ങളിലൂടെ പരന്ന വാർത്തകൾ വ്യാജമാണെന്നും തന്റെ ആസ്തി അളക്കുന്നതിൽ അവർക്ക് തെറ്റുപറ്റിയെന്നും പറഞ്ഞാണ് മുംബൈയിലെ അന്ദേരിയിൽ വാങ്ങിയ പുതിയ വീടിന്റെ വില ആദിത്യ തുറന്നടിച്ചത്. തന്റെ വീടിന്റെ വില നാല് ലക്ഷം രൂപയല്ലെന്നും മറിച്ച് പത്തര കോടി നൽകിയാണ് വീട് സ്വന്തമാക്കിയതെന്നും ഗായകൻ അറിയിച്ചു.
അടുത്തിടെ നൽകിയ ഒരു അഭിമുഖത്തിൽ അവതാരകൻ വീടിന്റെ വില നാല് കോടിയാണെന്ന് കേട്ടല്ലോ എന്ന് ചോദിച്ചപ്പോൾ ചിരിച്ചുകൊണ്ട് തെറ്റു തിരുത്തുകയായിരുന്നു ആദിത്യ. "വീടിന്റെ വില കുറച്ച് കാണിച്ചിരിക്കുകയാണ്. ശരിക്കും ഞാൻ 10.5 കോടി നൽകി. ഞാൻ വളരെ കുഞ്ഞിലെ മുതൽ ജോലി ചെയ്യാൻ തുടങ്ങിയതാണ്", ആദിത്യ പറഞ്ഞു. ടെലിവിഷനിൽ ജോലി ചെയ്യുന്നവർക്ക് നല്ല ശമ്പളം കിട്ടുമെന്നും ഇതോടൊപ്പം അദ്ദേഹം പറയുകയുണ്ടായി. ഗായകൻ എന്നതിലുപരി ടെലിവിഷൻ ഷോകളിൽ അവതാരകനായും ആദിത്യ എത്താറുണ്ട്. ഇന്ത്യൻ ഐഡൾ എന്ന ഷോയാണ് ഇപ്പോൾ അവതരിപ്പിക്കുന്നത്.
അഞ്ച് കിടപ്പുമുറികളുള്ള വീടാണ് ആദിത്യ സ്വന്തമാക്കിയിരിക്കുന്നത്. അച്ഛനും പ്രമുഖ ഗായകനുമായ ഉദിത് നാരായണനും അമ്മ ദീപ നാരായണും താമസിക്കുന്നതിന് വളരെ അടുത്താണ് ഇത്. കഴിഞ്ഞ ആഴ്ചയായിരുന്നു ആദിത്യയും കാമുകി ശ്വേതയും തമ്മിലുള്ള വിവാഹം നടന്നത്.
മോഹനി എന്ന നേപ്പാളി സിനിമയിലൂടെ 1992ലാണ് ആദിത്യ നാരായൺ ആദ്യമായി ഗാനം ആലപിക്കുന്നത്. രംഗീല എന്ന സിനിമയിൽ 1995ൽ ബാലതാരമായും അഭിനയിച്ചിരുന്നു. ഏറ്റവും ഒടുവിൽ സുശാന്ത് സിംഗിന്റെ ദിൽ ബെച്ചാരെ എന്ന സിനിമയ്‍ക്ക് വേണ്ടിയാണ് ആദിത്യ പാടിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
