'കറുത്തവളുടെ കഥ പറയാനും വെളുത്ത നടികൾ കറുത്ത നിറം കലക്കിയ പാത്രത്തിൽ ചാടണം, അവർ എത്ര കഷ്ടപ്പെടുന്നുണ്ടല്ലേ'

മലയാള സിനിമയ്ക്ക് കറുത്ത നിറത്തിലുള്ള നായികമാരോടുള്ള താൽപ്പര്യക്കുറവ് വ്യക്തമാക്കി നടൻ ഹരീഷ് പേരടി. മുൻകാല സംവിധായകർ കറുത്ത നിറത്തിന് തങ്ങളുടെ  ടീനേജ് മനസ്സിൽ നായികാ സങ്കൽപമുണ്ടാക്കിയിരുന്നെന്നാണ് ഫേയ്സ്ബുക്ക് പോസ്റ്റിൽ അദ്ദേഹം കുറിക്കുന്നത്.  
ഭരതൻ, പത്മരാജൻ, കെ.ജി ജോർജ്ജ് എന്നിവരുടെ സിനിമകളിൽ അഭിനയിച്ച സൂര്യയെക്കുറിച്ച് എടുത്തു പറഞ്ഞുകൊണ്ടാണ് കുറിപ്പ്. എന്നാൽ കറുത്ത സൗന്ദര്യങ്ങൾ മലയാളസിനിമക്ക് എവിടെയോ നഷ്ട്ടപ്പെട്ടുപോയി. ഇന്ന് കറുത്തവളുടെ കഥ പറയാനും വെളുത്ത നടികൾ കറുത്ത നിറം കലക്കിയ പാത്രത്തിൽ ചാടേണ്ട അവസ്ഥയാണെന്നും അദ്ദേഹം പറയുന്നു.

ഹരീഷ് പേരടിയുടെ കുറിപ്പ്

കറുത്ത നിറത്തിന് ഞങ്ങളുടെ ടീനേജ് മനസ്സിൽ നായികാ സങ്കൽപമുണ്ടാക്കിയ സംവിധായകൻ...പിന്നിട് കറുത്ത നിറമുള്ള പെൺകുട്ടികളെ കാണുമ്പോൾ ബഹുമാനം ഉണ്ടാക്കിയ കലാകാരൻ ...അന്നത്തെ കാമുകൻമാർക്ക് കാമുകി ഒരു ഭരതൻ ടച്ചാണെന്ന് പറയുന്നത് തന്നെ ഒരു അഭിമാനമായിരുന്നു...സൂര്യ എന്ന നടി പറങ്കി മലയിലൂടെ വളർന്ന് ആദാമിന്റെ വാരിയെല്ലിൽ എത്തുമ്പോഴേക്കും കലയും കച്ചവടവും നടക്കുന്ന സിനിമാ സൗന്ദര്യബോധമായി അത് മാറിയിരുന്നു..ശാരിയിലൂടെയും മാതുവിലൂടെയും അത് കുറച്ച് കാലം കൂടി നിലനിന്നിരുന്നെങ്കിലും ആ കറുത്ത സൗന്ദര്യങ്ങൾ മലയാളസിനിമക്ക് എവിടെയോ നഷ്ട്ടപ്പെട്ടു...

ഇപ്പോൾ കറുത്ത നായകന്റെ കഥകൾ പറയാനും നായികക്ക് വെളുപ്പ് നിർബന്ധമാണ്..വെളുത്ത നായകൻ ഒരിക്കലും കറുത്തപെണ്ണിനേ പ്രേമിക്കാൻ പാടില്ലാ എന്നും സിനിമ കാണുന്ന നമുക്ക് ഉറപ്പാണ്...അയ്യപ്പൻ നായരുടെ ഭാര്യ കറുത്തവളാവൻ പോലും ഒരു കാരണമുണ്ട് ..അയാൾ ശരിക്കും ഒരു നായരല്ലാ എന്നതുതന്നെ ... ഇന്ന് കറുത്തവളുടെ കഥ പറയാനും വെളുത്ത നടികൾ കറുത്ത നിറം കലക്കിയ പാത്രത്തിൽ ചാടണം...നമ്മുടെ വെളുത്ത നടി നടൻമാർ നമുക്ക് വേണ്ടി എത്ര കഷട്ടപെടുന്നുണ്ട്ല്ലേ ?...