ഡ്രാഗൺ കുഞ്ഞുങ്ങളുടേയും ദിനോസർ കുഞ്ഞുങ്ങളുടേയും വിൽപ്പനക്കാരാണ് സോഷ്യൽ മീഡിയ നിറയെ. പല വെറൈറ്റിയിലുള്ള കുഞ്ഞുങ്ങളെ സൈബർലോകത്ത് കിട്ടും. പ്രമുഖരുടെ പോസ്റ്റുകൾക്കടിയിൽ വിൽപ്പനക്കാരുടെ കച്ചവടം കൊഴുക്കുന്നതിനിടെ തന്റെ കയ്യിലുള്ള സ്പെഷ്യൽ ഡ്രാഗണെ പരിചയപ്പെടുത്തുകയാണ് രമേഷ് പിഷാരടി. ഫയർ ആൻഡ് സേഫ്റ്റി ഡിപ്ലോമ എടുത്ത ഡ്രാഗണുമായാണ് താരത്തിന്റെ നിൽപ്പ്.
ഇഗ്വാനയ്ക്കൊപ്പം നിൽക്കുന്ന ചിത്രമാണ് താരം പോസ്റ്റ് ചെയ്തിരിക്കുന്നത്. ‘ഡ്രാഗൺ, തീ അണയ്ക്കാൻ പരിശീലനം ലഭിച്ചത്...(ഫയർ ആൻഡ് സേഫ്റ്റി ഡിപ്ലോമ)’ എന്ന അടിക്കുറിപ്പിലാണ് ചിത്രം. താരം സംവിധാനം ചെയ്ത പഞ്ചവർണ്ണ തത്തയിൽ ഇഗ്വാന പ്രധാന വേഷത്തിലെത്തുന്നുണ്ട്. അടിക്കുറിപ്പിന്റെ പേരിൽ ആരാധകരുടെ കയ്യടി നേടുന്ന താരമാണ് രമേഷ് പിഷാരടി. ഈ പോസ്റ്റും ഹിറ്റാവുകയാണ്.
പോസ്റ്റിന് താഴെ ട്രോളുകൾ നിറയുകയാണ്. ഉണക്ക മുന്തിരിയിൽ കാറ്റു നിറക്കുന്ന കോഴ്സ് പഠിപ്പിക്കുന്നുണ്ടെന്നും മഴ നനഞ്ഞ് തീതുപ്പാതായ ഡ്രോഗണുകളെ റിപ്പയർ ചെയ്യുമെന്നും പറഞ്ഞുകൊണ്ട് നിരവധി കമന്റുകളാണ് വരുന്നത്. അതിനൊപ്പം പിഷാരടിയെ ട്രോളാനും ആരാധകർ മറന്നില്ല. ഡ്രാഗൺ കുഞ്ഞുങ്ങളെന്ന പേരിൽ ഓന്തിനെ വിൽക്കാൻ ശ്രമിച്ചതിന് പിഷാരടി അറസ്റ്റിലായെന്നു പറഞ്ഞാണ് ട്രോൾ.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
