തീയേറ്ററുകളില് വിജയകരമായി പ്രദര്ശനം തുടരുന്ന അഞ്ചാംപാതിരയ്ക്ക് പിന്നാലെ മറ്റൊരു സൈക്കോ ത്രില്ലര് ചിത്രം കൂടി മലയാളത്തില് റിലീസിനെത്തുകയാണ്. ടൊവിനോ തോമസ് നായകനായി എത്തുന്ന പുതിയ ചിത്രം ഫോറന്സിക്കിന്റെ ട്രെയിലര് പുറത്തിറങ്ങി.
നവാഗതരായ അഖില് പോള്, അനസ് ഖാന് എന്നിവര് ഒരുക്കുന്ന ചിത്രമാണ് ഫോറന്സിക്. ടൊവിനോ ഫോറന്സിക് ഉദ്യോഗസ്ഥനായി എത്തുന്ന ചിത്രത്തില് മംമ്ത മോഹന്ദാസ് ആണ് നായിക.
സാമുവല് ജോണ് കാട്ടൂക്കാരന് എന്നാണ് ചിത്രത്തില് ടൊവിനോയുടെ കഥാപാത്രത്തിന്റെ പേര്. അഖില് പോളും, അനസ് ഖാനും ചേര്ന്നാണ് ചിത്രത്തിന് തിരക്കഥ ഒരുക്കിയിരിക്കുന്നതും. രഞ്ജി പണിക്കര്, റെബ മോണിക്ക ജോണ്, പ്രതാപ് പോത്തന്, തുടങ്ങിയവരും ചിത്രത്തില് അഭിനയിക്കുന്നുണ്ട്.
ടൊവിനോയ്ക്കൊപ്പം നിരവധി കുട്ടികളും ചിത്രത്തില് അഭിനയിക്കുന്നുണ്ട്. കാസ്റ്റിങ് കോള് വഴി തിരഞ്ഞെടുത്ത 17 പുതുമുഖങ്ങളാണ് ചിത്രത്തില് ഉള്ളത്.
നെവിസ് സോവ്യര്, സിജു മാത്യു എന്നിവരുടെ ജുവിസ് പ്രൊഡക്ഷന്സും രാജു മല്യത്തിന്റെ രാഗം മൂവീസും ചേര്ന്നാണ് ചിത്രത്തിന്റെ നിര്മ്മാണം. അഖില് ജോര്ജാണ് ചിത്രത്തിന്റെ ഛായാഗ്രഹണം നിര്വഹിക്കുന്നത്. ജെയ്ക്സ് ബിജോയ് ചിത്രത്തിന്റെ സംഗീത സംവിധാനം നിര്വഹിക്കുന്നു
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ