സക്കരിയ സംവിധാനം ചെയ്യുന്ന ഹലാൽ ലവ് സ്റ്റോറി ഓൺലൈൻ റിലീസിന്. ആമസോൺ പ്രൈമിലൂടെ ഒക്ടോബർ 15നാണ് ചിത്രം ആരാധകരിലേക്ക് എത്തുന്നത്. ചിത്രത്തിന്റെ മോഷൻ പോസ്റ്റർ പുറത്തുവിട്ടാണ് റിലീസ് പ്രഖ്യാപിച്ചത്. സുഡാനി ഫ്രം നൈജീരിയയിലൂടെ ആരാധകരെ ഞെട്ടിച്ച സക്കരിയയുടെ രണ്ടാമത്തെ ചിത്രമാണ് ഇത്.
ഇന്ദ്രജിത്ത് സുകുമാരനും ഗ്രേസ് ആന്റണിയുമാണ് ചിത്രത്തിൽ പ്രധാന വേഷത്തിൽ എത്തുന്നത്. ഇവരെ കൂടാതെ വലിയ താരനിര തന്നെ ചിത്രത്തിൽ അണിനിരക്കുന്നുണ്ട്. പാര്വതി തിരുവോത്ത്, ജോജു ജോര്ജ്, സൗബിന് ഷാഹിര്, ഷറഫുദ്ദീന് തുടങ്ങിയവരാണ് മറ്റു താരങ്ങൾ. സംവിധായകന് സക്കരിയയും മുഹ്സിന് പരാരിയും ചേര്ന്നാണ് ചിത്രത്തിന്റെ രചന നിര്വഹിച്ചിരിക്കുന്നത്.
ആഷിക് അബു, ജെസ്ന ആഷിം, ഹര്ഷാദ് അലി എന്നിവര് ചേര്ന്നാണ് ചിത്രം നിര്മ്മിക്കുന്നത്. സൈജു ശ്രീധരന് എഡിറ്റിംഗും അജയ് മേനോന് ചായാഗ്രഹണവും നിര്വ്വഹിക്കുന്ന ചിത്രത്തില് ബിജിബാല്, ഷഹബാസ് അമന്, റെക്സ് വിജയന്, യാക്സണ് ഗാരി പെരേര, നേഹ നായര് എന്നിവര് ചേര്ന്നാണ് സംഗീതം ഒരുക്കിയിരിക്കുന്നത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ