ഷെയ്ൻ നിഗമിനെ നായകനാക്കി ടി കെ രാജീവ് കുമാർ സംവിധാനം ചെയ്യുന്ന ബർമുഡ എന്ന ചിത്രത്തിനായി ഗാനമാലപിക്കാൻ മോഹൻലാൽ. ടി കെ രാജീവിന്റെ തന്നെ 'കണ്ണെഴുതി പൊട്ടുംതൊട്ട്' എന്ന ചിത്രത്തിൽ മോഹൻലാൽ പാടിയ 'കൈതപൂവിൻ കന്നികുറുമ്പിൽ തൊട്ടു തൊട്ടില്ല...' എന്ന ഗാനം മോഹൻലാൽ ആലപിച്ചിട്ടുണ്ട്. താരം തന്നെയാണ് പുതിയ പാട്ടിനെക്കുറിച്ചും പറഞ്ഞിരിക്കുന്നത്. അണിയറ പ്രവർത്തകർ ഇറക്കിയ വീഡിയോയിൽ പാട്ടിന്റെ പ്രത്യേകതകൾ വിവരിക്കുകയാണ് മോഹൻലാൽ.
ടി കെ രാജീവ് കുമാർ ഇങ്ങനെയൊരു കാര്യം ചോദിച്ചപ്പോൾ ഒട്ടും മടിയില്ലാതെ സമ്മതിച്ചുവെന്ന് മോഹൻലാൽ പറഞ്ഞു. "ഓർക്കസ്ട്രേഷനാണ് ഈ പാട്ടിന്റെ ഏറ്റവും വലിയ പ്രത്യേകത. ബുഡാപെസ്റ്റിൽ നിന്നുള്ളവരാണ് അത് ചെയ്യുന്നത്. പിങ്ക് പാന്ഥർ ഇൻവെസ്റ്റിഗേഷൻ പോലുള്ള രസമുള്ള സംഗീതസംവിധാനമാണുള്ളത്. രമേഷ് നാരായണനാണ് ഈണമിട്ടിരിക്കുന്നത്. വിനായക് ശശികുമാറാണ് വരികൾ. ഇങ്ങനെയൊരു പാട്ട് പാടാൻ അവസരം ലഭിച്ചതിൽ സന്തോഷമുണ്ട്", അദ്ദേഹം പറഞ്ഞു.
24 ഫ്രെയിംസ് പ്രൊഡക്ഷൻസിന്റെ ബാനറിൽ സൂരജ് സി.കെ, ബിജു സി.ജെ, ബാദുഷ എൻ.എം എന്നിവരാണ് ബർമുഡ നിർമിക്കുന്നത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ