വിവാദങ്ങളിൽ നിറഞ്ഞു നിൽക്കുന്നതിനിടെ ആയിഷ സുൽത്താന സംവിധാനം ചെയ്യുന്ന ചിത്രത്തിന്റെ പോസ്റ്റർ പുറത്ത്. ഫ്ളഷ് എന്ന് പേരിട്ടിരിക്കുന്ന ചിത്രത്തിന്റെ പോസ്റ്റർ ആന്റോ ജോസഫാണ് പുറത്തുവിട്ടത്. ലക്ഷദ്വീപ് വിഷയത്തെ ആസ്പദമാക്കിയുള്ളതാവും ചിത്രമെന്നാണ് പോസ്റ്റർ നൽകുന്ന സൂചന.
കടൽതീരത്തിലൂടെ നടന്നുവരുന്ന പെൺകുട്ടിയാണ് പോസ്റ്ററിൽ. ആയിഷ തിരക്കഥ എഴുതി സംവിധാനം ചെയ്യുന്ന ചിത്രം നിർമിക്കുന്നത് ബീന കാസിം ആണ്. കെജി രതീഷാണ് ഛായാഗ്രഹണം നിർവഹിക്കുന്നത്. വില്യം ഫ്രാൻസിസ് സംഗീതവും നൗഫൽ അബ്ദുള്ള എഡിറ്റിങ്ങും നിർവഹിക്കുന്നു.
നേരത്തെ തന്റെ ജീവിതം സിനിമയാക്കുമെന്ന് ആയിഷ വ്യക്തമാക്കിയിരുന്നു. എന്നാൽ ഫ്ളഷ് പറയുന്നത് ആയിഷയുടെ ജീവിതം തന്നെയാണോ എന്ന് വ്യക്തമല്ല. ലക്ഷദ്വീപ് അഡ്മിനിസ്ട്രേറ്റർക്കെതിരെയുള്ള പരാമർശമാണ് ആയിഷയെ വിവാദത്തിലെത്തിച്ചത്. ആയിഷയ്ക്കെതിരെ രാജ്യദ്രോഹക്കുറ്റം ചുമത്തിയിരിക്കിക്കുകയാണ്. അതിനിടെ കൊച്ചിയിൽ എത്തിയ കവരത്തി പൊലീസ് ഇപ്പോൾ ആയിഷയെ വീണ്ടും ചോദ്യം ചെയ്യുകയാണ്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ