വിവാദങ്ങളെല്ലാം കെട്ടടങ്ങി സോഷ്യല്‍ മീഡിയയില്‍ സജീവമാവുകയാണ് നടന്‍ ഷെയിന്‍ നിഗം. അതിനിടെ മോശം കമന്റ് നല്‍കിയയാള്‍ക്ക് താരം നല്‍കിയ മറുപടിയാണ് ഇപ്പോള്‍ ഹിറ്റാകുന്നത്. വനിതാ ശിശു ക്ഷേമ വകുപ്പിന്റെ ഒരു പോസ്റ്റ് താരം പങ്കുവെച്ചിരുന്നു. സോഷ്യല്‍ മീഡിയയില്‍ സ്ത്രീകളോട് മോശമായി പെരുമാറുന്നതിനെതിരെയായിരുന്നു പോസ്റ്റ്. ഇതിന് താഴെയാണ് താരത്തെ വ്യക്തിപരമായി ആക്ഷേപിക്കുന്ന തരത്തില്‍ കമന്റ് എത്തിയത്. വ്യക്തമായ മറുപടിയിലൂടെ അയാളുടെ വായടപ്പിച്ചിരിക്കുകയാണ് താരം
അല്ല കഞ്ചാവേ, സ്ത്രീയും പുരുഷനും ഒരേപോലെയല്ലേ, അപ്പൊപ്പിന്നെ സ്ത്രീകളോട് മാത്രം എന്തിനാ പ്രത്യേക മര്യാദ കാണിക്കുന്നത്? മര്യാദയൊക്കെ കൊടുത്താല്‍ കിട്ടും എന്നല്ലേ, ആണായാലും പെണ്ണായാലും- എന്നായിരുന്നു അയാളുടെ കമന്റ്. സ്ത്രീകളോട് മര്യാദ കാണിക്കാന്‍ സ്വന്തമായി പെങ്ങള്‍ വേണമെന്നില്ലെന്നായിരുന്നു താരത്തിന്റെ മറുപടി
താങ്കള്‍ ഉത്തരം അര്‍ഹിക്കുന്നില്ല എന്നാലും പറയാം, തുല്യതയില്‍ അഭിപ്രായ വ്യത്യാസമൊന്നുമില്ല. പക്ഷേ സ്ത്രീകളോട് മര്യാദ കാണിക്കുക എന്നൊരു അറിവ് ഉണ്ടാകാന്‍ സ്വന്തമായി പെങ്ങള്‍ വേണമെന്നില്ല. വളര്‍ന്നുവരുന്ന സാഹചര്യവും വളര്‍ത്തുഗുണവുംകൊണ്ട് പഠിക്കുന്ന ഒന്നാണ് എന്നെ എനിക്ക് അഭിപ്രായമുള്ളൂ. പിന്നെ ഈ പോസ്റ്റ് വനിതാ ശിശുക്ഷേമ വകുപ്പ് ഞരമ്പുരോഗികള്‍ക്ക് ഒരു അറിവിനായി പങ്കുവെച്ചതാണ് എന്നുള്ള കാര്യ ഓര്‍മിപ്പിക്കട്ടെ. ചിലര്‍ക്ക് കാണുമ്പോ കൊള്ളും, ചിലര്‍ക്ക് മാത്രം.- ഷെയിന്‍ കുറിച്ചു.
താരത്തിനെ പിന്തുണച്ചു നിരവധി പേരാണ് രംഗത്തെത്തിയത്. അതിനൊപ്പം കമന്റ് ചെയ്ത ആള്‍ക്കെതിരെ വിമര്‍ശനവും രൂക്ഷമായി. അതോടെ വിമര്‍ശകന്‍ കമന്റ് എഡിറ്റ് ചെയ്തു. കഞ്ചാവ് പ്രയോഗമാണ് ഒഴിവാക്കിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
