മഞ്ജു വാര്യർ പ്രധാന വേഷത്തിലെത്തുന്ന ആയിഷയുടെ ഫസ്റ്റ് ലുക്ക് പോസ്റ്റർ പുറത്ത്. വ്യത്യസ്തമായ ലുക്കിലാണ് താരം പ്രത്യക്ഷപ്പെടുന്നത്. താരത്തിന്റെ ചുരുണ്ടമുടിയും നൃത്തവും തന്നെയാണ് പോസ്റ്ററിനെ മനോഹരമാക്കുന്നത്. പാവാട ഉടുത്തുകൊണ്ട് മനോഹരമായി നൃത്തം ചെയ്യുകയാണ് താരം.
ഏറ്റവും മുതൽമുടക്കുള്ള സ്ത്രീകേന്ദ്രീകൃത സിനിമ
ഇന്തോ-അറബിക് ചിത്രം സംവിധാനം ചെയ്യുന്നത് നവാഗതനായ ആമിര്‍ പള്ളിക്കാല്‍ ആണ്. മലയാളത്തിനു പുറമേ ഇംഗ്ലിഷ്, അറബി, തമിഴ്, തെലുങ്ക്, ഹിന്ദി, കന്നഡ ഭാഷകളിലും റിലീസ് ചെയ്യും. പ്രഭുദേവയാണ് ആയിഷയുടെ നൃത്ത സംവിധാനം. മലയാളത്തിൽ ഇറങ്ങിയിട്ടുള്ള ഏറ്റവും മുതൽമുടക്കുള്ള സ്ത്രീകേന്ദ്രീകൃത സിനിമയായിരിക്കും ആയിഷയെന്ന് അണിയറ പ്രവർത്തകർ പറയുന്നത്.
ഷൂട്ടിങ് ദുബായിൽ
റാസൽ ഖൈമയിലെ അൽ ഖസ് അൽ ഗാമിദ് എന്ന കൊട്ടാര സമാനമായ വീട്ടിലാണ് സിനിമയുടെ ചിത്രീകരണം ആരംഭിച്ചത്. യുഎഇയിൽ ഒരു പ്രധാന റോഡ് അടച്ച് ചിത്രീകരണം നടത്തുന്നതിന്റെ വിഡിയോ കഴിഞ്ഞ ദിവസം പുറത്തു വന്നിരുന്നു. മഞ്ജു വാര്യരുടെ അഭിനയജീവിതത്തിലെ ഏറ്റവും മികച്ച കഥാപാത്രങ്ങളിലൊന്നാവും ആയിഷയെന്നാണ് കരുതപ്പെടുന്നത്. ക്ലാസ്മേറ്റ്സിലൂടെ ശ്രദ്ധേയയായ രാധിക ഈ ചിത്രത്തിൽ ഒരു സുപ്രധാന വേഷത്തിലെത്തുന്നുണ്. വിഷ്ണുശർമ ഛായാഗ്രഹണം നിർവഹിക്കുന്ന ആയിഷയുടെ രചന ആഷിഫ് കക്കോടിയാണ്. ക്രോസ് ബോർഡർ സിനിമയുടെ ബാനറിൽ സംവിധായകൻ സക്കറിയയാണ് നിർമാണം. ഫെദര്‍ ടച്ച് മൂവി ബോക്‌സ്, ഇമാജിന്‍ സിനിമാസ്, ലാസ്റ്റ് എക്‌സിറ്റ് സിനിമാസ്, മൂവീ ബക്കറ്റ് എന്നീ ബാനറുകളില്‍ ശംസുദീന്‍ മങ്കരത്തൊടി, സക്കറിയ വാവാട്, ഹാരിസ് ദേശം, അനീഷ് പി.ബി., ബിനീഷ് ചന്ദ്രൻ എന്നിവരാണ് സഹ നിർമാതാക്കൾ.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
