ന്യൂഡല്‍ഹി: ഗുജറാത്ത് തെരഞ്ഞെടുപ്പ് പ്രഖ്യാപനം വൈകുന്നത് സംബന്ധിച്ച വിവാദം പുകയുന്നതിനിടെ ,സംസ്ഥാന നിയമസഭയിലേക്കുളള തെരഞ്ഞെടുപ്പ് ഇലക്ഷന്‍ കമ്മീഷന്‍ ഇന്ന് പ്രഖ്യാപിച്ചേക്കും. രണ്ടുഘട്ടങ്ങളായി വോട്ടെടുപ്പ് നടത്താനാണ് തെരഞ്ഞെടുപ്പ് കമ്മീഷന്‍ ആലോചിക്കുന്നത് എന്നാണ് ബന്ധപ്പെട്ട വൃത്തങ്ങള്‍ നല്‍കുന്ന സൂചന. 182 അംഗങ്ങളുളള ഗുജറാത്ത് നിയമസഭയുടെ കാലാവധി ജനുവരി 23ന് അവസാനിക്കും.
ദിവസങ്ങള്‍ക്ക് മുന്‍പ് ഗുജറാത്തിനെ ഒഴിവാക്കി ഹിമാചല്‍ പ്രദേശിന്റെ തെരഞ്ഞെടുപ്പ് തീയതി മാത്രം ഇലക്ഷന്‍ കമ്മീഷന്‍ പ്രഖ്യാപിച്ചത് വലിയ വിമര്‍ശനത്തിന് വഴിവെച്ചിരുന്നു. നരേന്ദ്രമോദിയുടെ ഗുജറാത്ത് സന്ദര്‍ശനം പൂര്‍ത്തിയാക്കാനും, സംസ്ഥാനത്തെ ബിജെപി സര്‍ക്കാരിന്റെ ജനകീയ പദ്ധതികളുടെ പ്രഖ്യാപനത്തിന് അവസരം ഒരുക്കാനുമാണ് തെരഞ്ഞെടുപ്പ് പ്രഖ്യാപനം വൈകിച്ചത് എന്നായിരുന്നു മുഖ്യ ആക്ഷേപം. എന്നാല്‍ ഹിമാചല്‍ പ്രദേശിലെ മഞ്ഞുവീഴ്ച ഉള്‍പ്പെടെയുളള കാര്യങ്ങള്‍ ചൂണ്ടികാട്ടി തെരഞ്ഞെടുപ്പ് കമ്മീഷന്‍ തീരുമാനത്തെ തുടര്‍ച്ചയായി ന്യായീകരിക്കുന്നതാണ് പിന്നിട് കണ്ടത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
