ന്യൂഡല്‍ഹി: 2019 ലെ ലോക്‌സഭാ തിരഞ്ഞെടുപ്പിനെ കുറിച്ച് ചര്‍ച്ച ചെയ്യുന്നതിനും വോട്ടിംഗ് യന്ത്രം സംബന്ധിച്ച ആക്ഷേപങ്ങള്‍ പരിഹരിക്കുന്നതിനുമായി തിരഞ്ഞെടുപ്പ് കമ്മീഷന്‍ സര്‍വ്വകക്ഷിയോഗം വിളിക്കുന്നു. ഈ മാസം 27 നാണ് യോഗം നിശ്ചയിച്ചിരിക്കുന്നത്. ഏഴ് ദേശീയ പാര്‍ട്ടി പ്രതിനിധികളെയും 51 പ്രാദേശിക പാര്‍ട്ടി പ്രതിനിധികളെയുമാണ് യോഗത്തില്‍ പങ്കെടുക്കുന്നതിനായി കമ്മീഷന്‍ വിളിച്ചിട്ടുള്ളത്.
പെയ്ഡ് ന്യൂസ്, മാതൃകാ പെരുമാറ്റച്ചട്ടലംഘനം, വിദ്വേഷ പ്രസംഗങ്ങള്‍ തുടങ്ങിയ കാര്യങ്ങളില്‍ രാഷ്ട്രീയപ്പാര്‍ട്ടികള്‍ക്ക് കമ്മീഷന്റെ വക ബോധവത്കരണവും ചട്ടങ്ങളും നല്‍കുമെന്ന് കമ്മീഷന്‍ അറിയിച്ചു.
വോട്ടിംഗ് യന്ത്രത്തില്‍ വ്യാപകമായി തിരിമറി കാണിക്കുന്നുവെന്ന ആക്ഷേപം പ്രതിപക്ഷ കക്ഷികള്‍ക്കുണ്ട്. അതേസമയം ഈ ആരോപണത്തെ കഴിഞ്ഞ വര്‍ഷം നടത്തിയ വോട്ടിംഗ് യന്ത്രം ചാലഞ്ചില്‍ ആര്‍ക്കും വിജയിക്കാന്‍ കഴിഞ്ഞില്ലെന്ന വാദം കൊണ്ടാവും കമ്മീഷന്‍ നേരിടുക. കഴിഞ്ഞ വര്‍ഷം ഇതേ പരാതിയുണ്ടായതിനെ തുടര്‍ന്നാണ് വോട്ട് ചെയ്തു കഴിയുമ്പോള്‍ സ്ലിപ് കിട്ടുന്ന രീതി കമ്മീഷന്‍ ഏര്‍പ്പെടുത്തിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
