ന്യൂഡല്‍ഹി: ഡല്‍ഹിയില്‍ ആറ് മണ്ഡലങ്ങളിലെ സ്ഥാനാര്‍ത്ഥികളെ പ്രഖ്യാപിച്ച് കോണ്‍ഗ്രസ്. മുന്‍മുഖ്യമന്ത്രി ഷീലാ ദീക്ഷിത് നോര്‍ത്ത് ഈസ്റ്റ് മണ്ഡലത്തില്‍ മത്സരിക്കും.
ചാന്ദ്‌നി ചൗക്കില്‍ ജെപി അഗര്‍വാളും, ഈസ്റ്റ് ഡല്‍ഹിയില്‍ അരവിന്ദര്‍ സിംഗ് ലവ് ലിയും ന്യൂഡല്‍ഹി മണ്ഡലത്തില്‍ അജയ് മാക്കനും, നോര്‍ത്ത് വെസ്റ്റ് ഡല്‍ഹിയില്‍ രാജേഷ് ലിലോതിയയും വെസ്റ്റ് ഡല്‍ഹിയില്‍ മഹബാല്‍ മിശ്രയും മത്സരിക്കും.
ആംആദ്മി പാര്‍ട്ടിയുമായുള്ള സഖ്യസാധ്യത അവസാനിച്ചതോടെയാണ് കോണ്‍ഗ്രസ് സ്ഥാനാര്‍ത്ഥികളെ പ്രഖ്യാപിച്ചത്. ഡല്‍ഹിയില്‍ നാല് സീറ്റില്‍ എഎപി മത്സരിക്കാന്‍ കോണ്‍ഗ്രസ് സമ്മതിച്ചെങ്കിലും ഹരിയാനയിലും പഞ്ചാബിലും സഖ്യംവേണമെന്ന് വാശിപ്പിടിച്ചതോടെയാണ് സഖ്യസാധ്യത അടഞ്ഞത്.
ബിജെപി നാല് സ്ഥാനാര്‍ത്ഥികളെ ഇതിനകം പ്രഖ്യാപിച്ചിട്ടുണ്ട്. ഡോ. ഹര്‍ഷവര്‍ധന്‍, മനോജ് തിവാരി, പ്രവേഷ് വര്‍മ, രമേഷ് ബിധുരി എന്നിവരാണ് ആദ്യപട്ടികയില്‍ ഇടംപിടിച്ചത്. കഴിഞ്ഞ ലോക്‌സഭാ തെരഞ്ഞടുപ്പില്‍ ഏഴുസീറ്റുകളിലും ബിജെപിയ്ക്കായിരുന്നു വിജയം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
