ഗാന്ധിനഗര്‍: ആഭ്യന്തര മന്ത്രി അമിത് ഷാ ഇന്ത്യയുടെ ഉരുക്കുമനുഷ്യനാണെന്ന് റിലയന്‍സ് ഇന്‍ഡസ്ട്രീസ് ചെയര്‍മാന്‍ മുകേഷ് അംബാനി. അമിത് ഷാ യഥാര്‍ഥ കര്‍മയോഗിയാണെന്നും മുകേഷ് അംബാനി വിശേഷിപ്പിച്ചു. പണ്ഡിറ്റ് ദീന്‍ദയാല്‍ പെട്രോളിയം യൂണിവേഴ്‌സിറ്റി ബിരുദ ദാന ചടങ്ങില്‍ സംസാരിക്കുകയായിരുന്നു അദ്ദേഹം. അമിത് ഷായുടെ സാന്നിധ്യത്തിലായിരുന്നു അംബാനിയുടെ പ്രശംസ.
''അമിത് ഭായി, നിങ്ങളാണ് യഥാര്‍ഥ കര്‍മയോഗി, വാസ്തവത്തില്‍ നിങ്ങളാണ് രാജ്യത്തിന്റെ ഉരുക്കു മനുഷ്യന്‍. നിങ്ങളെപ്പോലൊരു നേതാവിനെ ലഭിച്ചതിലൂടെ ഇന്ത്യ അനുഗ്രഹിക്കപ്പെട്ടിരിക്കുന്നു'' മുകേഷ് അംബാനി പറഞ്ഞു.
ഇന്ത്യ ഇപ്പോള്‍ സുരക്ഷിത കരങ്ങളിലാണെന്ന് മുകേഷ് അംബാനി അഭിപ്രായപ്പെട്ടു. ''അഭിലാഷങ്ങളുടെ തോത് ഒരിക്കലും കുറച്ചുകൊണ്ടുവരരുത്. വലിയ സ്വപ്‌നങ്ങള്‍ കാണാന്‍ മടിച്ചുനില്‍ക്കരുത്. നാളെയുടെ ഇന്ത്യ എല്ലാ അഭിലാഷങ്ങളെയും സ്വ്പനങ്ങളെയും പൂര്‍ത്തീകരിക്കാന്‍ അവസരങ്ങളൊരുക്കുന്നതായിരിക്കുമെന്ന പ്രതീക്ഷ എപ്പോഴും പുലര്‍ത്തണം'' -അംബാനി ചടങ്ങില്‍ പറഞ്ഞു.
2014 വരെ രാജ്യത്തിന്റെ സമ്പദ് വ്യവസ്ഥയെ രക്ഷിക്കാനുള്ള ഒരു ശ്രമവും നടന്നിട്ടില്ലെന്ന് അമിത് ഷാ പറഞ്ഞു. കഴിഞ്ഞ അഞ്വു വര്‍ഷം കൊണ്ട് ലോകത്തെ ഏറ്റവും വളര്‍ച്ചയുള്ള രാജ്യമായി ഇന്ത്യ മാറിയെന്ന് ഷാ അവകാശപ്പെട്ടു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
