ന്യൂഡല്‍ഹി: രാഹുല്‍ ഗാന്ധി പാര്‍ട്ടി അധ്യക്ഷ പദവിയില്‍ തുടരന്നുതു സംബന്ധിച് അനിശ്ചിതത്വം തുടരുന്നതിനിടെ കോണ്‍ഗ്രസിന്റെ പാര്‍ലമെന്ററി പാര്‍ട്ടി യോഗം ഡല്‍ഹിയില്‍. യുപിഎ അധ്യക്ഷ സോണിയാ ഗാന്ധിയുടെ അധ്യക്ഷതയിലാണ് യോഗം. കോണ്‍ഗ്രസിന്റെ ലോക്‌സഭാ കക്ഷി നേതാവിനെ ഇന്നത്തെ യോഗം തെരഞ്ഞെടുക്കാനിടയില്ല.
പാര്‍ട്ടി അധ്യക്ഷസ്ഥാനത്തുനിന്ന് മാറാനുള്ള തീരുമാനത്തില്‍ രാഹുല്‍ ഗാ്ന്ധി ഉറച്ചുനില്‍ക്കുന്നതായാണ് വിവരം. പുതിയ അധ്യക്ഷനെ തെരഞ്ഞെടുക്കാന്‍ തന്നെ വന്നുകണ്ട നേതാക്കളോട് രാഹുല്‍ നിര്‍ദേശിച്ചതായി സൂചനകളുണ്ട്. അതിനിടെ നടക്കുന്ന പാര്‍ലമെന്ററി പാര്‍ട്ടി യോഗത്തില്‍ രാഹുലിനു വേണ്ടി മുറവിളികള്‍ ഉയര്‍ന്നേക്കും.
അതിനിടെ രാഹുല്‍ തുടരണമെന്ന ആവശ്യവുമായി സമ്മര്‍ദം ചെലുത്താന്‍ കേരള എംപിമാര്‍ ശ്രമം തുടങ്ങിയിട്ടുണ്ട്. കേരളത്തില്‍നിന്നുള്ള എംപിമാര്‍ സോണിയയെയും രാഹുലിനെയും പ്രത്യേകം കണ്ടേക്കും.
ഇന്നത്തെ യോഗത്തില്‍ ലോക്‌സഭ കക്ഷി നേതൃസ്ഥാനം ചര്‍ച്ചയാവില്ല. പാര്‍ലമെന്റ് സമ്മേളനം ഈ മാസം 16ന് മാത്രമാണ് ചേരുക. ഈ സാഹചര്യത്തിലാണ് കക്ഷിനേതാവിനെ തിരഞ്ഞെടുക്കുന്നത് നീട്ടിവെച്ചത്.
രാഹുല്‍ ഗാന്ധി തയാറായില്ലെങ്കില്‍ ശശി തരൂര്‍, മനീഷ് തിവാരി എന്നിവരുടെ പേരുകള്‍ ലോക്‌സഭാ കക്ഷി നേതാവായി പരിഗണിച്ചേക്കും. കൊടിക്കുന്നില്‍ സുരേഷിന്റെ പേരും ഇതുമായി ബന്ധപ്പെട്ട് ിഉയരുന്നുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
