ബംഗളൂരു: ബംഗളൂരുവിലെ വണ്ടര്ലാ അമ്യൂസ്മെന്റ് പാര്ക്കില് റൈഡിന്റെ നിയന്ത്രണം വിട്ടുണ്ടായ അപകടത്തില് നാലുപേര്ക്ക് ഗുരുതര പരിക്ക്.
സാങ്കേതികത്തകരാറുമൂലം ഹറിക്കെയ്ന് എന്ന റൈഡറിന്റെ നിയന്ത്രണം നഷ്ടമായാണ് അപകടമുണ്ടായത്. പാര്ക്കിലെത്തിയ ഒരാള് സോഷ്യല് മീഡിയയിലൂടെ അപകടദൃശ്യം പോസ്റ്റ് ചെയ്തതോടെയാണ് സംഭവം പുറംലോകമറിഞ്ഞത്.
ഉയരത്തില് നിന്നും താഴോട്ട് വന്ന് പതിച്ച റൈഡ്, മുന്നിരയില് ഇരുന്ന നാലുപേരുടെ കാല്മുട്ടിലാണ് പതിച്ചത്. താഴെ നിന്നും ഉയര്ന്ന് 20 അടി പൊക്കത്തില് കറങ്ങുന്നതാണ് ഹറിക്കെയ്ന് എന്ന റൈഡ്. 22പേര്ക്ക് കയറാവുന്നതാണ് റൈഡ്.നാലുപേരുടെയും കാല്മുട്ടുകള് തകര്ന്നിട്ടുണ്ട്. വൈദ്യുതി നിലച്ചതാണ് അപകടത്തിന് കാരണമെന്നാണ് പൊലിസ് പറയുന്നത്. അപകട വിവരം അമ്യൂസ്മെന്റ് പാര്ക്ക് അധികൃതര് പൊലീസിനെ അറിയിച്ചിട്ടുണ്ടായിരുന്നില്ല.
പാര്ക്കിലെ ജീവനക്കാര് തന്നെ റൈഡ് താഴേക്ക് വലിച്ച് ആളുകളെ പുറത്തെത്തിക്കാന് ശ്രമിച്ചപ്പോഴാണ് സാങ്കേതിക തകരാറുണ്ടായത്. ഇതിനെ തുടര്ന്ന് റൈഡ് താഴേക്ക് പതിച്ചു. അപ്പോഴാണ് മുമ്പിലിരുന്ന നാല് പേര്ക്ക് പരുക്കേറ്റതെന്ന് ബിദാദി എസ്പി ഹരീഷ് പറഞ്ഞു. പരിക്കേറ്റ ഒരാള് പൊലീസില് പരാതി നല്കിയിട്ടുണ്ടെന്നും എസ്പി വ്യക്തമാക്കി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ