ചെന്നൈ: പിറന്നാള്‍ദിനം ആഘോഷിക്കാന്‍ രാത്രിയില്‍ വീടിന് പുറത്തിറങ്ങിയ പ്രായപൂര്‍ത്തിയാകാത്ത പെണ്‍കുട്ടി കൂട്ടബലാത്സംഗത്തിനിരയായി. ആറ് പേര്‍ ചേര്‍ന്ന് പെണ്‍കുട്ടിയെ കൂട്ട ബലാത്സംഗത്തിനിരയാക്കുകയായിരുന്നു. സംഭവത്തില്‍ നാല് പേര്‍ അറസ്റ്റിലായതായി പൊലീസ് അറിയിച്ചു. തമിഴ്‌നാട്ടിലെ കോയമ്പത്തൂരിലാണ് സംഭവം.
ചൊവ്വാഴ്ച സുഹൃത്തിനൊപ്പം പിറന്നാള്‍ ആഘോഷിക്കുന്നതിനായി പാര്‍ക്കിലെത്തി മടങ്ങുമ്പോള്‍ പ്ലസ് വണ്‍ വിദ്യാര്‍ത്ഥിനിയെ ഒരു സംഘം പിന്‍തുടരുകയായിരുന്നു. പെണ്‍കുട്ടിക്കൊപ്പമുള്ള സുഹൃത്തിനെ മര്‍ദ്ദിച്ച ശേഷം പെണ്‍കുട്ടിയെ ഒഴിഞ്ഞ പ്രദേശത്തെത്തിച്ച് പീഡിപ്പിക്കുകയായിരുന്നു. ഇതിന് പിന്നാലെ ആറംഗസംഘം പെണ്‍കുട്ടിയെ പീഡിപ്പിക്കുന്നത് വീഡിയോയില്‍ പകര്‍ത്തുകയും ചെയ്‌തെന്ന് പൊലീസ് പറയുന്നു.
പിറ്റേദിവസം ഈ ദുരനുഭവം പെണ്‍കുട്ടി അമ്മയോട് പറയുകയായിരുന്നു. ഇതേതുടര്‍ന്ന് അടുത്ത ദിവസം തന്നെ പെണ്‍കുട്ടിയുടെ വീട്ടുകാര്‍ പൊലീസില്‍ പരാതി നല്‍കുകയായിരുന്നു. പരാതിയുടെ അടിസ്ഥാനത്തില്‍ അന്വേഷണസംഘം നാല് പേരെ അറസ്റ്റുചെയ്തു. അവശേഷിക്കുന്നവര്‍ക്ക് വേണ്ടി അന്വേഷണം വ്യാപകമാക്കിയാതായും പൊലീസ് പറഞ്ഞു. പ്രതികള്‍ക്കെതിരെ പോക്‌സോ ഉള്‍പ്പടെയുള്ള വകുപ്പുകള്‍ ചുമത്തിയതായും പൊലീസ് പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
